بعد زواج استمر نحو 4 شهور، أقامت «مريم.ع» موظفة خدمة العملاء في إحدى الشركات، دعوى خلع في محكمة الزنانيري حملّت رقم 2185 لعام 2018، لاستحالة العشرة مع زوجها «محمد.م».

بعد عام من الخطوبة و4 أشهر على الزواج، لجأت الشابة العشرينية للخلع، موضحة لـ«هن»: «اتجوزنا عن حب وخطوبة سنة ونص تقريبًا، ولكن بعد الجواز اكتشفت فيه حاجات تانية مكنتش أعرفها والعصبية بقت زيادة جدًا لدرجة الإهانة ومد الإيد.. تربيتي مختلفة عنه تمامًا هو من عيلة عادي ضرب الزوج لزوجته والشتيمة والتهزيق وإحنا مش كدا فمستحملتش الإهانة دي».

4 أشهر من المعاملة السيئة تعرضت لها «مريم»: «قعدنا طول الفترة كأننا أخوات مع محاولات بسيطة للمعاشرة الزوجية لكن لم تتم، وآخر موقف اتعصب عليّ وطردني في نص الليل بقميص النوم بعد ما كررت طلبي إننا نروح نزور دكتور.. فطلقني واتعصب علي وضربني وطردني من الشقة وروحت عند بيت والدي بعد ما الجيران ساعدوني».

محاولات الصلح بينهما لم تنجح، وتوضح الزوجة: «بعد كام يوم بدأ يتصل ويعيط ويعتذر لأهلي على سوء المعاملة واتهمني إني بمنع نفسي عنه وبعصبه.. ولما رديت عليه اعتذر وطلب مني نرجع تاني والدي طلب منه يجيب والدته ويرجع يعتذرلي في البيت ولما جه قدامهم قال علي قليلة أدب والكلام ده كان أدام أبويا علشان قولت قدام أهله إنه عنده مشكلة ولازم يوعدني قدامهم يروح يتعالج وميمدش ايده علي تاني».

قرار بالخلع اتخذته «مريم»: «كل الحب راح لما ضربني وطردني وأهاني قدام أهلي كمان.. كان ممكن أستحمل زي ما صبرت عليه الـ4 شهور وأسكت لكن الإهانة لأ.. والحمدلله محصلش حاجة ومافيش عيال».