استهلت الإعلامية رضوى الشربيني، حلقة برنامجها «هي وبس» على «CBC سفرة»، بسرد شكوى وصلتها من فتاة تقدَّم لها شاب وطلب بعض الشروط من أجل إتمام الزواج: «كانت هتجبلي شلل».

والقصة التي وصلت إلى صندوق رسائل «الشربيني» كما روتها: «أنا بحب راجل جدًا وفتى أحلامي والحمد لله معندناش أي مشاكل بس هو قالي إنَّه هيتجوزني وهو عايز يتقدملي ومامته كلمتني وكلم أمي بس هو عنده شوية طلبات والطلبات دي طبعًا شروط».

وتابعت سرد القصة: «طلبه الأول إنّي أتخن 15 كيلو لأني يا رضوى رفيعة قوي فأنا عايزة رجيم التخن لأنه قالي مش هينفع أتجوزك وإنتي رفيعة كده».

واستطردت: «هو كمان مش عاجبه طريقة كلامي وعايزكي تحطي لينك [رابط] إزاي أتكلم وأبقى كيوت وكده لأنه مش هيتجوزني بطريقة كلامي دي وعايزني أغيّر من طريقة لبسي وكمان عايزني أبطل أكلم نص صحابي».

ووجهت رضوى الشربيني بعض الأسئلة لهذه الفتاة: «هل لما هتتجوزيه مش هتاكلي ومش هتعرفي تبقى شعنونة ولو خسيتي بعد الجواز هيطلقك؟».

وقالت الشربيني: «هتغيري لبسك واستايلك وهتزيدي 20 كيلو بس إحنا كمان عندنا شروط» متابعة: «يعني لو عنده كرش ينزل الكرش عشان ترضي تتجوزيه ولو معندوش كرش يعمل سكس باكس [عضلات البطن] وكل يوم يروح الجيم ويعمل عضلات ويضرب في فيتامينات عشان يبقى بادي بلدنج ولو قصير يعمل عقلة عشان يطول لأننا بنحب الرجالة الطويلة طول الوقت ويتكلم باتيكيت ويشرب بايب ولما يتكلم معايا يقولي يا هانم زي بشوات زمان ونبقى كده خالصين يبقى هو عنده شروط عشان يتجوزك وإنتي كمان عندك شروك عشان تتجوزيه».

واستطردت: «شفط بطنه وطلع سكس باكس وعمل عضلات وطول وغير طريقة كلامه وقالك يا هانم وبايب وغير شغلانته بالمرة يبقى نتجوزه ولو معملش كده منتجوزوش».