أعلنت رضوى موسى، والدة الطفل زين يوسف، بطل إعلانات رمضان "زين هو التحدي"، عن أخبار غير سارة بشأن صحة ابنها الذي أصيب بالسرطان مرتين، وانتصر عليه، وهو دون العاشرة من عمره.

رضوى كتبت عبر الصفحة الرسمية لزين على موقع التواصل "فيس بوك"، أن السرطان عاد ليهاجم زين مرة أخرى: "الورم نتيجته طلعت واتأكدنا أنه للأسف مش حميد وبالفعل سرطان في مراحل بدري اسمه renal cell carcinoma وهو نوع من أنواع سرطان الكلية نادر جدا أنه ييجي لمريض neuroblastoma لكن ربنا ليه حكمة في كل شيء، علاج السرطان الأول كيماوي وإشعاع هو اللي سبب السرطان التاني، الحمد لله من قبل ومن بعد".

وتابعت رضوى: "إحنا موجوعين ومخضوضين لكن إيماننا بربنا ملوش حدود، الغضب اللي جوانا ناحية المرض ده كافي أنه يهد جبال وهدفنا دلوقتي هو أننا نكسب المعركة دي كمان، لسه مش عارفين لو زين حيحتاج علاج ولا العملية فقط كافية وحنعرف أكتر الأسبوع الجاي، اللي عارفينه أن زين قدامنا كويس، متعافي من السرطان بقاله سنتين وهدفنا أنه يتعافي لسنين قدام، أنا وتامر والد زين حيتم اختبارنا في حالة أن زين احتاج متبرع بكلية لأنها الوسيلة الوحيدة لاستئصال الورم حاليا هي استئصال الكلية كلها، وعلى قد ما أنا مش مصدقة اني بكتب الكلام ده بس يقيني بربنا أنه حيعدينا من المرحلة دي زي ما عدانا من اللي أسوأ منها، وأننا حنفتكر الفترة ونشكر ربنا على أنها خلصت".

وقالت رضوى: "سرطان الأطفال مرض خطير، علاج سرطان الأطفال خطير وهو نفسه بيسبب سرطان، أولادنا من حقهم يعيشوا طفولتهم بحرية وعشان كدة لازم نفضل كلنا نحارب في جبهة واحدة ضد سرطان الأطفال، النهاردة يبدأ أول يوم من مشوار جديد في رحلتنا ضد عدونا الأول السرطان، وحنقف له بكل قوتنا وقوة الدعاء".