قصة شعر شهيرة ظهرت بها لسنوات طويلة، وكانت النموذج المفضل للكثيرات ممن يتابعن برامج الإعلامية نجوى إبراهيم، التي اشتهرت بـ«ماما نجوى»، فقد دخلت البيوت المصرية بأدائها السلس وتميزها في تقديم محتوى أحبه الكبار والصغار، ومؤخرًا ربط الناس قصر شعرها بإصابتها بالسرطان، بعد إعلانها إنها أصيبت به وأجرت في رحلة العلاج «7 آلاف عملية»، لكن هل هناك علاقة بقصر شعرها والسرطان بالفعل؟

السر وراء قصة شعر ماما نجوى إبراهيم

منذ أيام قليلة صدمت نجوى إبراهيم متابعيها، في تصريحات عن حالتها الصحية، قائلة: «سني 80 سنة، وعندي سرطانات، وعاملة 7 آلاف عملية، وهعتزل وهموت قريب، الناس بتستكتر على الابتسامة، وليه لازم كل الناس اللي بتضحك يبقى عندها ملايين؟»، وهي جملة بين تصريح طويل باحت فيه بما يدور في عقلها، حزينة على قرأته من تعليقات سلبية لبعض الناس، لتخرج بعدها حملة دعم كبيرة لـ«ماما نجوى»، بينما ربط البعض قصر شعرها بإصابتها بالسرطان، متسألين عن سر تلك القصة الشهيرة.

وعن السبب الحقيقي وراء قصة شعر ماما نجوى، فقد تحدثت عنه من قبل في أحد اللقاءات التليفزيونية عبر برنامج «الستات ميعرفوش يكدبوا»، قائلة: «السبب ورا قصة شعري كان إجبار انتهي للاختيار، أنا لما جيت أقدم في مجلة التليفزيون كان سنة 65 حاجة كده، بصيت لقيتهم بصولي قالولي أنتي عيلة تعالي السنة الجاية، عيلة إزاي أنا 18 سنة، قولت أجي السنة الجاية إيه، عادة اللي بيروح لوظيفة بيقولوا تعالي بكرة، ليه حضرتك بتقولي تعالي السنة الجاية، قالتلي عشان تكبري شوية».

وتابعت: «كنت عاملة زعرورة ولابسة جزمة كاوتش، 15 سنة، دخلت الامتحان نجحت خدت أسبوع ودخلت هوا، عملت إيه بقى كانت صفاير شعري تخينه قصيتها قعدت في الضفيرة حوالي ربع ساعة، فاعمل شعري طبقات، قصيتهم وربطت منديل، عشان أداري شعري من أبويا وأمي، ومن وقتها وهو كده، وكان ده علامة الآنسات الكبار، وجبت كعب 5 سم ووقعت، وعملت كل حاجة عشان بس أطلع في التليفزيون وأشتغل».

عقاب ماما نجوى على قص شعرها

تلك الحركة العفوية التي قامت بها ماما نجوى إبراهيم لتصبح آنسة كبيرة، ويتم قبولها في التليفزيون لم تنل إعجاب والديها ونالت عقابًا عليها، قالت: «عقاب قص شعري أخدت أقلام قلم من أمي وقلم من أبويا، واحد من بابا عشان قصيت شعري، والتاني من أمي عشان شربت القهوة بعد الضيوف، كانت تقولي عيب مفيش بنت تشرب قهوة واقعدوا بره، فضيت باقي القهوة في طبق الفنجان وشربت عمل علامة على وشي، قالتلي شربتي قهوة قولت لها لا، جابتلي مرايا قالتلي أمال إيه ده، لقيت علامة كبيرة على وشي».