كشفت الفنانة ياسمين رئيس ملامح عن حياتها الزوجية، قائلة: «المفروض أي زوج يفضل يقول كلام حلو لمراته طول الوقت، ولازم ياخد باله عن أي حاجة جديدة في شكلها، لو الراجل بيحلق شعره دي حاجة عادية، بس الست لما تعمل شعرها لازم الراجل ياخد باله».

جوزي شغله كله مع ستات.. ذوقه حلو أوي

وأضافت «رئيس»، خلال تصريحات تلفزيونية، «ابني الصغير لو عملت أي حاجة في شعري مهما كانت بياخد باله، بس باباه بيقولي ده بينصب عليكي طول الوقت وإنتي بتصدقيه، ابني بينام وأنا شعري قصير، وبيصحى يلاقيني بشعر عشان شغلي، يعني ممكن ينام وشعري قصير عشان عندي دور فيجيلي الكوافير وهو نايم يركب ليا شعري».

وتابعت: «الست بتزعل لما جوزها مش بياخد باله أنها عملت شعرها، خاصة الستات اللي بيمثل جوزها كل حياتها، معندهاش حاجة تانية، هي بتعمل شعرها لمين؟ ما علشان هو يشوفها حلوة في عينيه ويحسسها أنه خد باله».

وواصلت: «أنا كممثلة ممكن وضعي يبقى مختلف، بغير شكلي كتير بحكم شغلي، بس لو أنا ست وعايشة مفيش حد في حياتي غير جوزي، الراجل اللي بيشوفني كل يوم، لازم لما أعمل شعري يقولي كلمة حلوة ويحسسني إنه أخد باله وعملتله حاجة».

واستكملت: «جوزي طبعا بياخد باله إني عملت شعري، جوزي أكتر حد بياخد باله، شغله كله مع ستات وذوقه حلو في الستات وكل حاجة، بغير طبعا على جوزي، ومفيش ست مش بتغير».

كواليس دورها في مسلسل «ملوك الجدعنة»

وعن ظهورها كفتاة شعبية في مسلسل «ملوك الجدعنة»، قالت: «خلينا متفقين إن مش أي دور لأي بنت شعبية أو عايشة في حارة شبه بعض، لأن كل الناس مختلفين، وشخصية (فاتن) في المسلسل تختلف عن شخصية شعبية أنا عملتها في حاجات تانية قبل كدة سواء (طرف تالت) أو (فتاة المصنع)، لكن فاتن لذيذة ودمها خفيف وبنت بلد وكل حياتها بيتها وعيلتها ومحل باباها».