رئيس مجلس الادارة:

د. محمود مسلم

رئيس التحرير:

مصطفى عمار

رئيس مجلس الإدارة:

د. محمود مسلم

رئيس التحرير:

مصطفى عمار

علاقات و مجتمع

عروس تتهم خبيرة مكياج باحتجازها.. والأخيرة ترد: دي منظر واحدة كسرت فرحتها؟

كتب: روان مسعد -

06:38 م | الثلاثاء 27 أكتوبر 2020

عروسة الاسماعيلية

أصبحت خبيرة التجميل والمكياج هند الخضري في الوقت الحالي من أكثر الأسماء تداولا على مواقع التواصل الاجتماعي، بعد مشاجرة إلكترونية عنيفة بنيها وبين عروسة اتهمتها باحتجازها، في يوم فرحها لتعتذر لها شقيقاتها، حيث روت جاسمين محمد تفاصيل ما جرة معها في منشور مطول على صفحتها الشخصية على موقع التواصل الاجتماعي "فيسبوك"، وردت عليها خبيرة التجميل هند الخضري عبر خاصية "ستوري"، على موقع تبادل الصور والفيديوهات "إنستجرام".

بدأت العروسة ياسمين محمد تلك المشاجرة، حيث استهلت منشورها بـ"هند الخضري متحفظة علي عروسة عشان عايزة اخت العروسة تطلع تعتذر لها.. زي ما قريتوا كدا انا حجزت مع هند الخضري باكدچ زفاف شاملة ٤ ماسكات وشعر ومانيكير وميكب ولينسز.. ميعاد الماسكات ٢٢/١٠ روحت المكان عندها عملولي ٤ ماسكات حاجه عبيطه كدا ماسكين سكراب زي بتاع جارنية وماسك مرطب بالنعناع وواحد رابع كمان.. في نص ساعه او اقل وخلصت.. قابلتني هند الخضري وهي نازلة ( بيعملولي ماسكات في الرسبشن ) كانت نازلة سلمت عليا وسألتها عن اللوك هحدده أمتي يومها؟ ولا من قبلها (انا اول مره اعمل full makeup) وكنت بفهم منها.. دقيقتين حرفيا ونزلت".

وعن ثاني المواقف التي تعرضت لها روت ياسمين، "الفرح ٢٥/١٠ كلمتني المساعده بتاعتها قالت لي بكره الصبح تجلنا ٩ عشان اخرج الساعه واحده من عندهم، الصبح زي اي عروسة روحت متأخرة ساعه الا ربع.. روحت ملقتش غير بنت قعدت منتظرة لحد ١١ ونص محدش جه.. ولا عملت شعر ولا اظافر ولا اي حاجه".

هذا الموقف عرض العروسة للبكاء، "أنا حرفيا انهارت عياط كلمت اهلي منهاره ان اتصرفوا ونلاقي حد يعملي اهلي هادوني واهدي وبتاع وان شاء الله كله هيكون تمام، البنت الي هناك لاقتني منهارة عياط وبتكلم ف التليفون بقول انا لا عملت شعري ولا ظوافري لسه ولا حد جه.. بدأت تعملي شعري، علي ١٢ وربع او وتلت هند جت معاملة في منتهي قلة الذوق.. كانت البنت اللي هتعملي اظافري جت قبلها ب ربع ساعه بدأت تعملي مانيكير يارتني كنت عملته لنفسي لو اعرف انها فاشلة كدا.. بدأنا ميكب ١ الا ربع".

وأضافت، "واختي جت ف بقولها اللنسز دي خضراء ولا انا مش شايفة اختي قالت لي ومعاها صاحبتنا لا دي خضراء صريحه قولتلها انا قلت ل هند عايزاها لون زي الصورة بندقي عسلي كدا.. اختي قالت لي لو مش عاجباكي نغيرها المهم تتبسطي.. طلعت لهند بقولها لو سمحتي .. لاقتها معاها مكالمه ف قلت خلاص ادخل اكمل حاجتي وأبدا البس لحد لما تخلص.. فضلت شوية ف اختي قالت لي هو ايه قلة الذوق دي بجد.. ف طلعت بتقولها لو سمحتي كدا متأخر.. وعينك ما تشوف الا النور.. وصلة ردحح و طردوا اختي وهند بتقولها انتي مين انتي دانا هند الخضري امشي اطلعي برا كلموولي الامن يطلع يرميها برا طبعا اختي قالت لها انا مش هنزل من هنا غير ب اختي دي عروسة وفستانها ضخم".

وأكملت، "هند دخلت لي بتقولي امشي طلعيها بدل ماطلب الامن ويطردوها، انا حرفيا متنحه قولتلها انا خلاص نازلة لفي لي الطرحه وانزل امشي عشر دقايق بس.. رفضت قلت لأختي عشان خاطري انزلي وانا عشر دقايق ونازلة وراكي واختي نازلة قالت لهم حسبي الله ونعم الوكيل فيكم هو ايييه المعامله الـ*** دي هند جابت لهم حد تحت يشتمهم ب افظظع الشتايم ويطردهم برا المول اللي فيه استوديو الميكب عرفت بعد الفرح".

وقالت ياسمين، "انا فوق لوحدي لساني معقود من وصلة الردح انا قلت هيضربوني البنت اللي بتلبسني الفستان بتقولهم حرام عليكم دي عروسة ذنبها ايه انكم شديتوا مع اختها، قعدوا يشتموني انا واختي و ردح متواصل، قالولي أنتي هتنزلي من هنا لوحدك والعريس يستلمك من الشارع تحت و لو حد طلع انا هطلبله الشرطه، الراجل اللي هند قالت له يشتم اختي وصاحبتنا كلم هند قالها بتقولك انها هتطلب البوليس، واصله من الردح تاني بتقولي انا خطيبي ظابط واحنا هنعمل وهنسوي فيكم و ان نفوذه واصله وأنها هتأذي اختي".

"فاطمه الخضري اخت هند دخلت لفت لي الطرحه ف عشر دقايق طبعا ب كلام يسم البدن وانا خرساء انا لو نطقت هتضرب حرفياً همج جدا واتكاتروا عليا، لاقيت هند مدت ايدها ف عيني اخدت اللنسز الخضراء وحطت عسلي مكانها ورمت الخضراء، انا كل الي ف دماغي الحق التصوير واليوم ومعيطش"

وتحدثت عن احتجازها، "جاية نازلة حبسوني ومش عايزين ينزلوووني قولتلها ازاي يعني انتي حابساني! قالت لي اه وأنا متحفظة عليكي لحد لما تطلعي اختك تعتذر لي واقبل اسفها دانا هند الخضري.. بتقولي انتي جاية متأخرة وكان المفروض اعاقبك وامشيكي من هنا الساعه ٤ بما انك محترمتيش مواعيدك.. وتحمدي ربنا ان مفيش عروسة غيرك انهارده.. وانا اصلا غلطانه اني اتكلمت معاكي يوم الماسكات انا هند الخضري مبتكلمش مع حد أنا واضح انك متعرفيش مين هند الخضري و شتمت و ردحت و بتقولي انا عرايسي من طبقة معينه وناس نظيفة كل دا وانا محبوسة وكاميرات المول تجبني انها حبستني ساعه فوق"

وأكملت، "قالتها هتفضلي ساكته كدا.. قولتلها يومي قالت لي انا مالي ما يبوظ ولا يولع تطلعيها تعتذر علي طريقتها وأسلوبها.. فضلت ساكته تقريبا فقدوا فيا الامل.. قمت وحاولت اطلع وامشي زعقولي انتي رايحه فين مفيش نزول وتدفعي اللي عليكي تمن اخر لنسز كام؟ ٢٠٠ اديت لها ال٢٠٠ محدش رضي ياخدها حطتها علي الكنبة وقولتلها انا هنزل يعني هنزل مسكت بقيت شنطي ولميت فستاني الضخم ونزلت ازحف بيه لحد قهوة المستكاوي".

واختتمت، "سبحان من صبرني ومعيطتش ولا رديت عشان الموضوع يتلم.. انا اتبهدلت انتي اسوأ حاجه حصلت لي ف حياتي وابشع انسانه انا قابلتها انا هفضل لحد اخر يوم ف عمري بقول حسبي الله ونعم الوكيل فيكي وعلي الرعب و دمي الي اتحرق ونشف من الخضة اللي كنت فيها، بوظت يوم فرحي، ربنا ينتقم منكم يارب وتتردلك يوم فرحك وتعرفي انه ذنبي وخدي بالك معدش زمن اننا نهدد الناس ان خطيبي وجوزي ظابط وهيعمل وهيسوي فيكم أنتي ولا حاجه ولو اتخدشت بس كدا هعمل فيكي محضر أنك هددتيني ب خطيبك الظابط و نفوذه وانه قالك تحفظي عليها لحد اما اختها تعتذرلك منكم لله".

هذا المنشور كتبته العروس على كافة مجموعات الفتيات على "فيسبوك"، كما انتشر على نطاق وغاسع فقد حصد آلاف التعليقات والإعجابات في وقت قصير ما جعل خبيرة التجميل من الإسماعيلية هند الخضري ترد بدورها عليه في منشور مطول عبر "إنستجرام".

كتبت هند الخضري على صفحتها الشخصية، "والله والله والله انا مسمحاكي على كل اللي حصل دا، انتي افتريتي عليا وقولتي حبستك علشان اللي عملته اختك، بس والله مسمحاكي واسفه اني اتعصبت عليكي من فعل اختك وربنا يسامحها حرفيا على كل اللي حصل دا".

ولكنها سرعات ما عدلت كلامها قائلة، "صباح الخيرانا كنت متعاطفه مع العروسه جدا لان غلطتني الوحيده اني انفعلت عليها هي مش أختها اللي اختها عملته كان محدش يستحمله و انها تشتمني بالفاظ قذرة دا انا مسمحش بيه و لا اي انسان طبيعي يسمح انه يتهان ف شغله و يتقالي اللينسز بشعه قومي اعمليها يلا مع اني اصلا مستنيه العروسة تلبس وتخلص الطرحة علشان اعملها  تنزل تحت تكمل مشاكل وتعمل بلاوي تحت بطريقة بشعه وشتايم والفاظ ابشع من المول عمل معاها مشكلة كبيره لانها تعدت عليهم بألفاظ خارجه و طريقه مفيش بنت تتكلم بيها".

وأضافت، "المشكلة ان اتقال من العروسة اني قولتلها انا ليا سلطه وبهددها الكلام دا كذب ومحصلش وانا قولت هتشوفي كلامي وتسكتي لا دا انتي من كتر البجاحة اللي فيكي بتألفي اني قولتلك انا خطيبي ظابط انتي عرفتي خطيبي ظابط لما حكتيلي انك كنت عايشه ف دهب فتره الكورونا و الكماين كانت رخمه ف التفتيش قولتلك ساعتها (دا شغل خطيبي ) اخذتيها لصالحك علشان تطلعي المظلومه؟".

وأكملت، "يعني انتي بتفتري ورايحة تقولي اني متحفظة عليكي ايه المرض دا انا لو كنت اتحفظت عليكي كنت هنكتسب بوست كدا؟ ولا هتنزلي تعملي محضر ومش هتنزلي اصلا غير بإثبات حاله انا مش هقول غير حسبي الله ونعم الوكيل فيكي ويا رب يتردلك باذن الله الاذيه اللي حرفيا ماليش اي دعوه بيها ومشكلة المول الكبيرة اللي الجيران بتتكلم عليها دي مش من عندي فوق دي اختها المحترمه".

ورت عليها قائلة، "دي منظر واحدة أنا كسرت بخاطرهغا يوم فرحها؟"، واختتمت، "توصلي انك تعملي شير وتضحكي على شرفي و سمعتي و تشهري بيا ف فورا هيتعمل محضر سب و قذف و اي حد جاب سيرتي هعمل فيه محضر سب و قذف و تشهير و انا حرفيا عمري ما اتعاملت مع ناس زيك كدا واتمنى اني مقابلش ناس زيك ف حياتي مش بس عرايس، ربنا ينتقم منك".