رسائل قوية وجهتها الإعلامية رضوى الشربيني، خلال مقطع فيديو بثته عبر حسابها الرسمي على فيس بوك، للفنانتين ياسمين عبدالعزيز وآيتن عامر، عن دورهما في مسلسلات رمضان لعام 2020، عن مسلسلي "ونحب تاني ليه"، و"فرصة ثانية".

4 دقائق كانت المدة التي استغرقتها "رضوى" في توجيه رسالتها لهما، وقالت في بداية مقطع الفيديو: "إيه يا آيتن يا عامر؟، إيه اللي انتي عاملاه ده، بقالي 5 أيام شايلة وساكتة وبقول بنتنا هتعقل وبنتنا مبتعقلش، الحلقة الأولى خطفتيه من البنت، التانية روحتي اتقدمتيله وقولنا يمكن البنت عندها اعتقاد فظيع بين المساواة بين الرجل والمرأة وراحت اتقدمتله".

سابلك التورتة ومشي.. عديتي ليفل الوحش

وأضافت "الشربيني" في مقطع الفيديو: "الحلقة الثالثة عملتوا فرح وهو سابلك التورتة ومشي، مفيش كرامة؟ ليفل الوحش يا آيتن عامر عدتيه، روحتيله البيت قولت بنتنا عندها صدمة، بحاول أوجدلك أي أسباب، قالك انتي طالق وأنا ندمت ان أنا اتجوزتك، تقومي تردي عليه علشان تثبتلي إن أنا بحبك".

رضوى الشربيني: انتوا بتعملوا إيه في بناتنا؟

"مكنتوش بتلعبوا دور استيميشن وهو خسرك، ده طلقك يا ماما"، بهذه العبارة واصلت "رضوى" انتقاداتها لآيتن عامر: "إحنا في البرنامج بنقول ده يستاهل قلة على وشه، إيه يا آيتن؟، أنا مش هسكت، وعمالة تنتحري وتعيطي، انتوا بتعملوا إيه في بناتنا يا جماعة".

وأردفت رضوى: "السنة اللي فاتت كنا بنقول لدينا الشربيني، سيبي البنطلون، بنقول لآيتن عامر، هو حولك لبنطلون، مفيش منطق خالص".

رضوى الشربيني توجه رسالة لآيتن عامر: جيبي حقك وحق البنات

ووجهت لها رسالة قالت خلالها: "إنتي معاكي 25 حلقة، يا تخلصي عليه وتجيبيه في شوال، وتجيبي حقك وحق البنات، وبلاش جملة مفيش كرامة في الحب".

رضوى الشربيني لياسمين عبدالعزيز: خليه يندم على اللي عمله

وانتقلت رضوى، للحديث عن ياسمين عبدالعزيز، قائلةً: "أنا قادرة أتفهم رد فعلك كزوجة مطلقة، دي ردود فعل هنتفهمها كستات".

واختتمت رضوى قائلة: "إنتي معاكي راجل في المسلسل طول بعرض، معاكي 25 حلقة تقولي للستات هاخد 15 حلقة، أعرف اعدي مرحلة الطلاق واتجوز وأحب وألاقي اللي يقدرني، وتخلي عبدالله "شريف منير"، يندم على اللي عمله، أنا هطق".

وتشارك ياسمين عبدالعزيز، في السباق الرمضاني لعام 2020، بمسلسل"ونحب تاني ليه"، مع شريف منير وكريم فهمي وسوسن بدر، وتشارك آيتن عامر في مسلسل "فرصة ثانية"، مع ياسمين صبري وأحمد مجدي.