بعد عامين من الطلاق، لجأت "حنان. م" 29 عامًا، إلى محكمة الأسرة لإقامة دعوى نفقة حملت رقم 1022/2018، ضد طليقها الذي امتنع عن دفع نفقة طفلته البالغة من العمر ست سنوات، بعدما طلب الاستحواذ على نصيبها من "بطاقة التموين"، وهو الأمر الذي رفضته الأم.

زواج تقليدي استمر نحو أربعة أعوام، تروي الزوجة لـ"هن": "اتجوزته عن طريق معارف مشتركة بينا وخلفت على طول بعد الجواز، لكن دايما مكناش مرتاحين وبينا مشاكل كبيرة انتهت بالطلاق والاتفاق على دفع 500 جنيه نفقة للبنت كل شهر وتقسيط نفقتي أنا وكان بيدفع لحد من حوالي سنة ونص فاتوا امتنع عن الدفع بعد جوازه".

خلافات بين الزوجين بعد الطلاق على النفقة، توضح: "اديته فرص كتير بعد جوازه وقدرت إنه مزنوق ماديا وعمري ما حرمته من بنته وكنت بخليه يشوفها ديما عشان أحافظ على نفسيتها ورغم إنه اتجوز موظفة بردو ومرتبهم كبير الاتنين لكن اديته فرصة وحتى مطلبتش زيادة والنفقة أصلا مبتكفيش أي حاجة والبنت مصاريفها كتيرة غير الإيجار لكن بقاله أكتر من سنة مدفعش ولا مليم ولما أكلمه يقولي مزنوق ومراتي بتولد ومش عارف ايه طيب مهو دي بردو بنتك ولها حقوق عليك".

مشكلة نشبت بين الأم وطليقها بسبب بطاقة التموين، تضيف: "آخر مشكلة عرفت إنه عايز يضم البنت على بطاقة التموين بتاعته وطبعا هي مش عايشة معاه والتموين بيسندني في المعيشة الحاجة بتكون أرخص من برا وطبعا رفضت فهددني بإنه ياخد البنت مني رغم إن الحضانة معايا وبردو مدفعش ولا مليم فلجأت للمحكمة عشان أخد نفقة بنتي ونفقتي كمان".