بعد نحو عام ونصف من الزواج، أقام "أحمد. ك" 28 عامًا، دعوى "نشوز" حملت رقم 1887/2019، ضد زوجته "حنان. ع" 24 عامًا، لرفضها العودة إلى منزل الزوجية وإصرارها على الحياة في منزل والدتها.

زواج تقليدي، وقع بين الزوجين منذ نحو عامين ونصف، يروي الزوج، لـ"هن": "كانت جارتنا وأمي رشحتهالي وشوفتها أكتر من مرة في البلكونة وبعد كدا اتقدمتلها واتجوزنا بعد ما جهزت الشقة.. أعجبت بيها لأنها كانت بنت طيبة عيبها الوحيد بتسمع لكلام الناس وخصوصا أمها".

صراع بين آراء الأم والزوج، نشبت إثره خلافات عديدة، يوضح: "قبل الفرح كان في بينا خلافات كتيرة بسبب ماما قالت كذا وأوقات كنت بشد معاها عشان بقولها مش عايز حد يتحكم في حياتي وأوقات تانية كنت بسكت عشان أمشي الدنيا وقولت بعد الجواز الوضع هيختلف لكن الوضع بقى أصعب كل شوية تمشي تقعد عند أمها بالأسبوع والاتنين والمفروض أنا أبيت عندهم مبعرفش أخد راحتي أصلا هناك ليه أقعد في بيت ناس غرب عني.. المفروض مراتي تقعد في بيتي أنا".

مطالبات من الزوج بالحد من زيارة الأهل، يضيف: "اتكلمت معاها كتير بالأدب والذوق وقولتلها نخفف شوية لكن طبعا أخدت الحمل حجة علشان تروح تقعد عندهم وسكت وتقبلت وقولت تعبانة بعد الولادة رجعت على بيت أمها بردو وقولت معلش ومن بعد الأربعين مش راضية تروح كل يوم حجة شكل بقالها 3 شهور على كدا أنا حاسس إني متجوزتش أصلا.. طب كنت قعدت عند أمي أهو على الأقل بتخدمني".

مشاجرة بين الزوجين وقعت، تدخلت فيها الأم، يوضح: "اتخانقت معاها في التليفون وهددتها بالطلاق لو مروحتش وقولتلها هاجي أخدك وسكت على أساس مراتي هتسمع كلامي.. طلعت عملالي كمين ولما روحت عندهم البيت أمها اتخانقت معايا وقالت كلام محصلش وبتقولي إني أنا عايزة أقطعها عنهم وطردتني وطبعا هما واخدين بنتي عندها 5 شهور ولحد دلوقت مشوفتهاش كام مرة على بعض.. ومراتي مبقتش ترد عليّ في التليفون وبعتتلي مع ناس تقول إنها هترفع علي قضية طلاق ونفقة".