بعد 16 عامًا من الزواج، أقدمت "غادة. ع" 41 عامًا، على إقامة دعوى "خلع" حملت رقم 1905/2018، ضد زوجها "محمد. ع" 49 عامًا، بعدما ضاقت من الحياة معه بسبب ميوله وأراءه السياسية الإرهابية.

زواج عن حب وقع بين الزوجين قبل أعوام مضت وأسفر عن إنجاب طفلين أكبرهما في الصف الثانوي، تروي الزوجة الأربعينية، لـ"هن": "اتجوزنا عن حب كان شاب شيك وطموح وعايز يسافر برا مصر وبيسمع أغاني ومحب للحياة وعمره مكان له في السياسة ولا حاجة لحد الثورة لما بدأ ينزل زي كل المصريين لكن اتلم على مجموعة اتعرف عليهم في الميدان وبدأ يتابع أنشطتهم لحد ما بقى متعصب جدا لدرجة لا تحتمل".

تغير في ظروف الحياة دفع لخلافات عديدة بين الزوجين: "الظروف اتغيرت جدا لدرجة إنه اتوقف عن العمل بسبب ميوله الإخوانية وكتاباته المحرضة على الدولة على فيسبوك.. كل وقت بتناقش فيه معاه ينتهي بخناقة بقى حرفيا درويش للإخوان وبيطبلهم مع إنه مش عضو تنظيم ولا أي حاجة ولا واخد منهم حاجة أصلا لكن بس بيتكلم وشايفهم مظلومين.. تعبت منه مبقاش الراجل اللي اتجوزته بقيت خايفة عليه وعلى عيالي ونفسي بسبب مش عارفة أخرتها إيه".

محاولة للهجرة إلى تركيا دفعت الزوجة الأربعينية إلى طلب "الخلع": "أكتر من مرة بقى يقولي عايز نروح نهاجر تركيا وطول اليوم مشغلنا القنوات الإخوانية بقيت خايفة ولادي يسمعوا الكلام ده ويشربوه.. طب هو كبير ومسؤول عن تصرفاته لكن العيال الصغيرة اللي في سن المراهقة ده ممكن يعملوا إيه! مبقاش ينفع نعيش هنا وبالفعل سافر أكتر من مرة تركيا وحاليا انتقل للحياة هناك بقاله فترة وأنا مش عايزة أسافر وأسيب بلدي إحنا مصريين وعيالي مستقبلهم هنا.. طلبت منه الطلاق أكتر من مرة هددني بالزواج من أجنبية لو مروحتش عيشت معاه هناك مع الولاد.. فطلبت الخلع".