بعد زواج استمر 13 عامًا، طلق "حامد. ع 41 عاما"، مزارع في إحدى قرى محافظة الدقهلية، زوجته الثانية "فاطمة. أ" 28 عامًا، بعدما أقامت ضده دعوى "خلع" رقم 742/2018 لاستحالة العشرة بينهما، بسبب إصراره على الاحتفاظ بحماره "مرزوق"، الذي ورثه عن والده، والمتبقي له من رائحته بعد بيعه قطعة أرض لإجراء عمليات "حقن مجهري" أملا في إنجاب طفلا يحمل اسمه بعد وفاته، على حد قوله. 

زواج تقليدي جمع بين الزوجين، يروي الزوج الأربعيني لـ"هن": "رفعت الخلع عشان تفضحني فطلقتها ومش هديها ولا مليم، أنا اتجوزتها وهي كانت عندها ظروف ورضيت بيها، وقبلت أبيع أرض أبويا عشان تعمل العملية وتخلف لكن مفيش فايدة كانت بتستغلني وأدفع الفلوس بس مكانتش بتهتم بالحمل ولا بتاخد الأدوية زي ما الدكتور بيقول، عشان تخسرني الفلوس ومتخلفش مني ودلوقت مرزوق الحمار مبقاش عاجبها في البيت".

حمل لم يكتمل كان سبب تأجج النزاع بين الزوجين، يضيف الزوج الأربعيني: "طول عمري بخدمها وشايلها ومرضتش أتجوز عليها ونفسي في حتة عيل يشيل اسمي من بعدي، بعت الأرض عشان تعمل العملية لكن مش هبيع حماري مرزوق عشان خاطرها، وهي لما شالت مني اتنمردت وسقطت وبتتلكك بمرزوق، أنا كل فلوسي راحت على الدكاترة، ومش عاجبها عايزاني أبيع الحمار اللي حيلتي في الدنيا أهو شايلني وبيساعدني أشتغل، لما أبيع الحمار مين يشيلني من بعده".

خلاف وقع بين "حامد" وزوجته اتهمت فيها "مرزوق الحمار" بإجهاضها، يوضح: "بقالها 13 سنة عايشة مع الحمار ومخلفتش، دلوقتي بقى هو السبب وهو وش النحس اللي سقطها، عملها إيه الحمار عشان تتشنج عليه وتتشرط علي يا هي يا الحمار في البيت".