بعد 9 أعوام من الزواج، أقام «محمد. ه» 36 عامًا، دعوى نشوز حملت رقم 1998/2018 ضد زوجته «منى. س» 28 عامًا، اتهمها فيها بإهمال أبناءه.

«كل يوم أجيب العيال من الشارع وأطلع ألاقيها قاعدة على الفيسبوك»، كانت بداية حديث الزوج الثلاثيني مع «هن»، خلال تواجده في محكمة الأسرة لحضور جلسة صلح مع زوجته في مكتب التسوية، مضيفًا: «بشتغل سواق نقل على باب الله ومواعيدي ملخبطة حسب الوردية والسفرية لكن بسعى على أكل عيشي وحلمي عيالي يطلعوا أحسن مني ويكملوا تعليمهم العالي.. لكن كل ما أروح ألاقي الواد بيلعب في الشارع ولما أسأله تكذب وتقولي لسه نازل حالا قبل ما تيجي ولما أروحه المدرسة يقولوا ابنك لعبي وقليل التربية.. بموته من الضرب عشان يتعلم بس العيب في أمه اللي مش عارفة تربيه وقاعدة على الزفت اللي اسمه الفيسبوك بتتكلم مع اللي يسوى واللي ميسواش».

خلافات بين الزوجين بسبب ما وصفه الزوج بـ«الإهمال»، يضيف: «مقصرتش معاها في حاجة.. اللي ربنا بيرزقني بيه بجيبهولها عشان ده رزق عيالي لكن تسيبهم في الشارع والواد يتكسر رجله من لعب الكورة وتقولي الواد أصله مش بتاع علام ولعبي.. أومال هي وظيفتها ايه.. أنيها في بيتي ليه.. عشان تاكل وتشرب وترمي العيال في الشارع.. بشوف الستات بتجري على عيالها وتراعيهم لكن ولادي أمهم مهملة في نفسها ولا بتهتم بيهم مش فارق معاها يفلحوا ويتعلموا ولا يشربوا مخدرات فاكرة العيال هيتربوا لوحدهم».

أحلام بالنجاح والتوفيق وحياة مختلفة تراود ذهن الأب لأبناءه الاثنين: «نفسي أشوف واحد مهندس والتاني دكتور ولا حاجة.. أبيع عمري كله بس أشوفهم بخير وناس محترمة.. وعارف إني غلطت عشان اختارت دي أمهم واحدة لموآخذة دماغها على قدها ولا فارق معاها حاجة بس قولتلها ميت مرة بلاش العيال ينزلوا الشارع عشان المنطقة وحشة وهيتعلموا حاجات غلط لكن مفيش فايدة مبتفهمش.. حتى الضرب مبيحوقش معاها عملت كل حاجة عشان تسمع الكلام وتحافظ على العيال وخلاص مبقتش عايزها لكن هي لا تصلح تكون أم ولا أثق في إنها تراعي عيالي لو طلقتها عشان كدا رفعت دعوى النشوز أمام محكمة الأسرة عشان القاضي يشوفلي حل».