بعد نحو عامين من الزواج، أقام «عمر.م» 28 عامًا، دعوى «نشوز» حملت رقم 1477/2018 ضد زوجته «ريهام.ي» 24 عامًا، اتهمها فيها بعدم إطاعته وترك منزل الزوجية منذ 7 أشهر.

وبدأت قصة الزوجين، بعدما تعرف «عمر» لـ«هن»، على زوجته خلال عملهما معًا في إحدى الشركات الخاصة، ليتقدم لخطبتها بعد علاقة حب استمرت شهر قليلة، لتدخل علاقتهما مرحلة جديد: «اتجوزنا عن حب كبير بينا وكنا متعلقين ببعض جدا لكن بعد الجواز كل حاجة اتغيرت بسبب أبوها وتصرفاته الغريبة.. كنت فاكر إن مشاكل فترة الخطوبة دي غيرة أب على بنته الوحيدة وعشان والدتها متوفية لكن بعد الجواز المشاكل بقت أكتر».

خلافات منذ بداية الزواج بسبب تدخل والد الزوجة، يضيف: «من شهر العسل لما سافرنا كان بيتصل عليها باستمرار بشكل يعصب وفي أوقات غريبة محدش يكلم عرسان فيها ويسألها ببجاحة بتعملوا أيه لدرجة كنت حاجز أسبوعين بعد 11 يوم رجعنا لأنها قالت بابا واحشني ومش متعودة أسيبه كدا واحترمت علاقتها بأبوها ورجعنا.. لكن هو مش بيحترم علاقتي بيها أبدا وبيتصرف بشكل غريب وبيتعمد يتحرش بيها قدامي وطول الوقت يبوسها ويحط ايده على ضهرها ويهزر بكلام قبيح».

ضغوطات من الزوجة لتحمل الأب غريب الأطوار، يوضح: «كل يومين تلاتة عايزة تروح لبباها.. عمري ما منعتها لكن الموضوع زاد عن حده بسبب بياتها عنده المستمر وهو لوحده وأنا بضايق وفي الفترة الأخيرة بقت تزعل إني بتكلم عليه وحش ولما حملت قولت مش عايز ولادي يكونوا عنده لأنه غريب ومش محترم.. واتخانقنا وغضبت وسابت البيت.. وصالحتها أكتر من مرة ورجعت شوية كويسة لكنه بدأ يزن عليها تاني ويدخل في حياتنا».

وأكمل «بدأت أحس منها إنها بتسمع كلامه ومش مضايقة منه ولا من مد ايده عليها كل شوية بحجة إنه أبوها ومش محترمة إني جوزها ومينفعش يبوسها كدا.. أسلوبه وتصرفاته مش شكل أب طبيعي.. وغيابها عن البيت خلاني ألجأ للمحكمة وأقيم دعوى النشوز عشان أوقف النفقة».