سألت عبير أحمد، مؤسس اتحاد أمهات مصر للنهوض بالتعليم، أولياء الأمور من الأمهات على صفحة الاتحاد عبر "فيس بوك"، حول الطريقة المناسبة التي يتبعهن في المذاكرة مع أبنائهن ومتى يلجأن للدروس الخصوصية؟، حتى يتبادلوا الاستفادة فيما بينهم.

وتجاوب العديد من أولياء الأمور، وقالت ولي أمر: "بالنسبه لي الحمد لله مبديش دروس خالص، أنا ماسكة مواد وزوجي معه مواد، والحفظ والأسئلة والمراجعة عليا مع مراحل أولادي الدراسية، ورافعين راسي ومش مبالغة، موضحة أن قرب الأب والأم من أولادهم دافع لهم قوي.

وأضافت ولي أمر أخرى: "مكنتش بدي دروس خصوصية في الأول، بس الضغط عليا لوحدي كبير لأن بباهم في الشغل طول النهار وبيرجع بالليل، قررت أن لازم أدي دروس، لأني تعبت ومعايا عيالي تالتة ابتدائي وسادسة، وتالته إعدادي".

وذكرت ولي أمر: "الكتاب الخارجي خير مساعد للمذاكرة للأم وهي بتذاكر لولادها، وطول خمس سنين ابتدائي مفيش دروس والمذاكرة أول بأول مع حل الكتاب الخارجي، لكن من أول الصف السادس الابتدائي بدأت أعطيه درس خصوصي في الرياضة والإنجليزي، وفي الإعدادية الأن زودت درس خصوص علوم"، واستكملت ولي أمر أخري: "أنا أسست ابني وهو عنده 4 سنين لحد دلوقتى هو في kg2 تجريبي مع نفس الميس، وتعتبر بتساعدني في المذاكرة وأنا بتابع كل يوم وبياخد كورس ماث".

وتابعت ولي أمر اخرى: "المذاكرة في البيت هي الأساس، أنا ولادي بياخدوا دروس، ومقسمه وقتي بينهم، أخلص لواحد وأكمل مع التاني لما قلبي وجعني من المناهدة"، وأضافت أخرى: "أنا لما كانوا صغيرين كنت بذاكر معاهم بعد المدرسة، لكن لما كبروا اعتمدوا على نفسهم وأنا سحبت نفسي واحدة واحدة عشان يعتمدوا على نفسهم ويعرفوا يعني إيه مسؤولية، ولأني نزلت الشغل فخلاص عرفوا اللى عليهم، أما بالنسبة للدروس الخصوصية ده بقى أمر طبيعي لأن مفيش استفادة من المدرسة بشيء، وهما ومجهودهم بقى، وفي الأول كانت الدروس للتفوق لكن الأن أصبحت بديل للمدرسة، لكن أنا حاسة إن فلوسي بتروح في الأرض".

وقالت ولي أمر: "أنا ليا وجهة نظر تانية وهي تعويد الولاد الاعتماد على نفسهم في موضوع المذاكرة، يعني نأسس لحد رابعة ابتدائي، نذاكر معاه ونساعده يعرف يعني إيه مذاكرة وبعد كده نسيبه يعتمد على  نفسه، بيروح المدرسة يفهم من المدرس ولو عنده مشكلة يسأل في المدرسة ويرجع البيت يذاكر ولو المشكلة مازالت موجوده تتدخل الأم أو الأب بعد ما يكون الولد جاب أخره ومش عارف يوصل لنتيجة، الطريقة دي اعتقد بطلع طالب معتمد على نفسه مثابر والمعلومة اللي بيتعب فيها بتثبت في دماغه، لكن اللجوء للمدرسين ده إضعاف لقدرات الطالب ويتحول لآلة بتحفظ وتستقبل من الأخرين وبس، ودي من وجهة نظري أفضل طريقة للتعليم رغم إن مش بعرف أطبقها كليا مع ولادي لكن لو قدرنا نوصل لده يبقى شيء ممتاز لهم".