مع اقتراب بداية الفصل الدراسي الثاني في المراحل الدراسية المختلفة، حيث يعود الطلاب للمدارس غدًا، لم تنته مدرسة "جواد علي حسني" الرسمية للغات بشبرا التابعة لإدارة الساحل التعليمية بمحافظة القاهرة، من أعمال الحفر حتى الآن.

تقول "داليا"، ولية أمر لـ3 طلاب في مراحل تعليمية مختلفة: "الدراسة بكرة وأعمال الحفر في المدرسة لسه مخلصتش، أرواح أولادنا في خطر بسبب الحفارات والمية اللي طلعت نتيجة الحفر".

وأضافت لـ"هن": "قدمنا شكاوى كتير في الإدارة التعليمية وعملنا محضر بالواقعة رقمه 458، ومفيش فايدة المدرسة بها حاليا أعمال إنشاءات وحفر ومعدات ثقيلة لإنشاء مبنى جديد في فناء المدرسة وتم بدء الحفر في إجازة نص السنة ومخلصتش لحد دلوقتي احنا إزاي هانودي أولادنا المدرسة محتاجين حد ينقذنا أولادنا في خطر"

وأشار ولي أمر أحد الطلاب في المدرسة، فضّل عدم ذكر اسمه، ويعمل مهندسا، إلى "إمكانية حدوث هبوط أرضي نتيجة لعمق الحفرة"، قائلا: "لما شوفت أعمال الحفر في المدرسة متوقع يحصل هبوط في الأرض لأن الحفر كان عميق جدا، مش هينفع نودي عيالنا المدرسة بكرة بالشكل ده، العمق ده هيبنوا عليه مبنى ضخم يضم 18 فصل إزاى كده!".

"حفارات ومعدات ثقيلة وحفرة مياه"، وضع أصاب أولياء الأمور بالقلق والذعر خوفًا على سلامة أطفالهم، وتساءل "محمد"، ولي أمر طالب بالمرحلة الابتدائية: "مش ممكن أي طفل يسقط في الحفرة دي إيه الاستفادة اللي هتعود على الطلاب من أعمال الحفر في الوقت ده، لحد دلوقتي الوضع زي ما هو ورجوع المدارس يوم الأحد محدش سامع لشكوانا ومتوقع يحصل هبوط في الأرض، إحنا مش هنودي أولادنا المدرسة، وهنعمل وقفة احتجاجية يوم الأحد اعتراضا على الوضع ده".