أدى طلاب الصف الأول الثانوي اليوم امتحان مادة الفيزياء، وعبر عدد من أولياء الأمور والطلاب عن صعوبة الامتحان وضيق الوقت المخصص للإجابة على الأسئلة.

وقالت أماني السيد، طالبة عن مستوى الامتحان: "الامتحان متسرب وبنفس ترتيب الأسئلة.. بس أنا مشفتش الإمتحان اللي اتسرب أصحابي قالوا إنه نفس الترتيب، ولكن يحتاج الامتحان إلى وقت أطول للإجابة لوجود بعض الأسئلة التي تحتاج إلى تفكير".

وتابعت أثناء حديثها لـ "هُن": "لازم يكون فيه رقابة على عملية تسريب الامتحان ازاي يتساوى الطالب اللي ذاكر والطالب اللي دخل نقل بجد حرام".

وعبر ماجد أحمد، طالب، عن استيائه من صعوبة الإمتحان وقال: "الامتحان صعب أوي ومش مباشر وضيق الوقت بيخلينا مش لاحقين نفكر في الإجابة يادوب افتكر قانون السؤال".

واعترض على تسريب الامتحانات متابعا: " كده الدرجات هتبقى مرتفعة مع العلم إن الامتحانات صعبة والوقت قصير وبكدة يبقى النظام الجديد نجح".

وذكرت تهانى أحمد، ولية أمر: "أصبح سؤالي لابني بعد العودة من الامتحان هو نفس الامتحان اللي كان متسرب معاك ولا فيه تغيير؟".

وتسائلت: "فين الاستفادة اللي هتعود على الطالب لما الامتحانات تتسرب فين الإبداع وكيف يتم تقيم الطلاب بهذا الشكل". 

وأضافت ميرنا ماجد، ولية أمر: "أن الامتحان بالنسبة للناس اللي مشفتش الإمتحان اللي متسرب صعب ومعظم الأسئلة مش موجودة في الكتاب"، متابعة: "مكنش ليها لازمة الدروس اللي دفعنا فيها دم قلبنا طالما الامتحان متسرب".