نشرت الإعلامية دعاء فاروق عبر صفحتها الشخصية على موقع تبادل الصور والفيديوهات صورة تهنئ من خلالها متابعيها ومحبيها بمناسبة السنة الجديدة، وانتهاء عام 2018.

وعلقت على الصورة موضحة بعض النقاط قائلةً: "كل سنة وكل حضراتكم طيبين بمناسبة السنة الجديدة، شوية ملحوظات بخصوص الاحتفال والأفراح والليالي الملاح.. أينعم أنا بحب الفرح والضحك والموسيقى والأفراح والاحتفالات، طول عمري من وأنا سنة، بنجيب تورتة وبنعمل أعياد ميلاد وبحضر أعياد ميلاد أصحابي وبنغني ونرقص مع بعض".

وتابعت: "في حفلات البنات والسيدات بنرقص، في الأفراح والتجمعات اللي فيها رجالة مش برقص بس بحضر وبسقف وبتبسط وبتصور وبسمع الأغاني".

وأردفت: "ولو حد قريب وعزيز على قلبي بهيص له بعمل لأولادي حفلات عيد ميلاد وبنغني لهم هابي بيرث داي وحيوا أبو الفصاد، أي حد بيعمل حفلة بمناسبة سبوع أو عيد ميلاد أوحفل تخرج أو حنه أو رأس سنة أو نص السنة أو شم نسيم أو عيد أم اوافتتاح محل أو لمة أصحاب بحب أحضر، أصدقاء مسيحيين بيعزموني على أي حاجة بحضر وببارك وبجامل زيهم زي الأصدقاء المسلمين".

وأشارت فاروق: "بروح سينما وبحب المسارح وبتفرج على أفلام ومسلسلات عربي وأجنبي عندي تلفزيون فيه كل القنوات بقلب وبتفرج عادي يا جماعة، بصيف وبنزل المايه بمايوه للمحجبات".

واختتمت موضحة: "أنا ست عادية عايشة حياتي بشكل طبيعي جدًا واللي بعمله في حياتي مبتكسفش منه وأقدر أعمله على الشاشة عادي، لا أعاني من الازدواجية ومتشعبطة في رضا ورحمة ربنا، استضافتي للشيوخ ومعرفة تعاليم ديني مش معناه إني امتنع عن الاستمتاع بكل ما هو مبهج ومفرح في الدنيا".

وهنأت الجماهير بقدوم العام الجديد قائلةً: "كل سنة وأنتم طيبين بمناسبة السنة الجديدة 2019".