نشرت رضوى موسى، والدة الطفل زين يوسف، عبر صفحته على موقع التواصل الاجتماعى "فيس بوك"، آخر تطورات الحالة الصحية للطفل "زين" مؤكدة خطورة المرحلة العلاجية التي يمر بها وصعوبة الآلام التي يشعر بها.

وكتبت "موسى": "زي أي أب وأم بيبقى مطلوب مننا ناخد قرارات يومية لولادنا، لكن ساعات بيبقى فيه قرارات أصعب من التانية، بالذات لما تتعلق بحياة أولادنا.. يوم الأربعاء الموافق 7 نوفمبر 2018، وجع زين وألمه وصل لمرحلة غير محتملة!! زين شبه اتشل.. مكنش قادر يمشى أو يقوم أو يقعد أو يحرك إيده.. لا عارف يغير هدومه و لا يهرش حتى.. الوجع بدأ من أكتر من شهر و كل محاولاتنا لوقف الوجع بائت بالفشل".

وأشارت "رضوى"، إلى عدم جدوى العلاج وقالت: "حاولنا نفهم مع الدكاترة إزاي العلاج اللي بياخده سببله ده مع إنه كان نوعا ما كويس ومتعايش الكام شهر اللي فاتو، مكانش فيه أي إجابة مقنعة! إزاي العلاج يعمل كده و يسوء كل يوم أكتر من اليوم اللي قبله.. قررنا إن ده مش أسلوب حياة وأخدنا واحد من أصعب قرارات حياتنا.. قررنا نوقف العلاج تماما بعد الاستخارة ودعينا أنه يبدأ يتحسن".

وأكدت أن نوع السرطان الذي أصيب به "زين" نادر ويصيب الكبار فقط والجسم يرفض استقبال العلاج الكيماوي أو الإشعاع، وأجمع الأطباء المعالجين على ضرورة إيقاف العلاج بشكل نهائي.

وتابعت: "آخر تحاليل وأشاعات بينت أن زين خالي من المرض باستثناء نقطة صغيرة بجانب الكلى لسه مش عارفين هي من أثار العملية ولا سرطان.. النقطة صغيرة جدا بس بتنور في الأشاعات وده اللي مخلينا مش فاهمين هي إيه.. هيتعمل تحليل تاني للموضوع ده وهنعرف إيه الخطوات اللي جاية في خلال أسبوع أو اتنين.. لو النقطة دي مش سرطان  الخطة هتفضل إننا نعمل تحاليل كاملة كل ثلات شهور، نكمل العلاج بالأدوية الطبيعية والأعشاب والغذاء".