قالت عبير أحمد، مؤسس اتحاد أمهات مصر للنهوض بالتعليم، إن أولياء الأمور وجهوا مجموعة من التساؤلات للدكتور طارق شوقي، وزير التربية والتعليم، وطالبوه بالرد عليها، خلال اجتماعه، بأعضاء لجنة التعليم يوم الأحد المقبل، في البرلمان، والعمل على حل المشاكل التي تواجههم في المدارس فيما يتعلق بالنظام التعليمي الجديد والقديم أيضا.

وتفاعل أولياء الأمور، عبر صفحة "اتحاد أمهات مصر للنهوض بالتعليم"، على "فيس بوك"، تعليقا على الاجتماع المزمع انعقاده، الأحد المقبل، بين وزير التعليم ولجنة التعليم في البرلمان.

وقالت سحر مختار، ولية أمر، "إزاى هايعرض حاجة هو طبقها بالفعل.. قولوا للوزير فات شهرين ونص ولا استلمنا تابلت ولا جربنا الامتحانات، ولا فيه نماذج امتحانات نزلت، ولا فيه مدرسين فاهمين، ولا تدريب".

واعترض بعض أولياء أمور طلاب الصف الأول الثانوي على عدم استلام أبنائهم "التابلت" حتى الآن.

وذكرت فاطمة رضوان، ولية أمر، "فين التابلت بتاع أولى ثانوى اللي المفروض إن الطالب تدرب عليه على الامتحانات، وفين شبكات النت اللي اتعملت".

وتابعت: "ليه الثانوية العامة تبقي 3 سنين، ما كفاية سنة، عبء نفسي جامد جدا ومادي كمان".

وعبرت مروة محمد، ولية أمر، عن أملها إلغاء قرار تحكم المدرس في الطالب فيما يتعلق بالدرجات، قائلة، "نفسي يلغي قرار إن المدرس يتحكم في الطالب من ناحية الدرجات، دلوقتي بيهددوا الطلاب لو ما دخلوش دروس معاهم هينزلوهم في الدرجة، وايه اللى هنستفيده من إنك تخلي 70 درجة تحت إيد المدرس".

وقالت شيرين حمدي، ولية أمر، "فين وعدك للنظام القديم بتخفيف المناهج؟، وبالنسبه للنظام الجديد فين التابلت فات شهرين ونص وهو نفس المنهج قائم على الحفظ، ولازم دروس خصوصية في كل المراحل الدراسية من كم المناهج العقيمة، مفيش تغيير خالص بل وأصبح الوضع صعب بالمواد الممتدة".

وأضافت أخرى، "محتاجين إعادة النظر في أولى ثانوي وعدد المواد لأنها كتير وعبء على الطلاب مش ملاحقين".

واقترحت "عزة"، ولية أمر أخرى، "الثانوية التراكمية بقت إجباري، كنا محتاجين سنة أولى ثانوي تطلع من المجموع زى السنة دي، على الأقل الأولاد يعرفوا المناهج مع الكم الرهيب فى المواد.. أي مرحلة انتقالية بتبقى فيها مواد جديدة وبطبيعة إن الأولاد مش متعودين عليها بتبقى الدرجات مش كويسة".

وكانت مصادر بوزارة التربية والتعليم، قد قالت في تصريحات صحفية، إن الدكتور طارق شوقي، وزير التربية والتعليم، سيعرض وجهة نظره حول نظام التعليم أمام لجنة التعليم في البرلمان، يوم الأحد المقبل.

وأكدت المصادر أن شوقي سيوضح كيفية تطبيق النظام الجديد، ومدى التعاون بينه وبين الجهات المعنية، بالإضافة إلى دور الوزارة في إعداد المعلمين والمدارس، وتهيئة المناخ العام لتقبل فكرة النظام الجديد، بالإضافة إلى الصعوبات التي تواجهها الوزارة في تطبيقه.