أخبار من الوطن نيوز
الإعلامي رضوى الشربيني

هاجمت الفنانة الشابة مي حسن، الإعلامية رضوى الشربيني، بسبب ما اعتبرته تحريض النساء على إهانة الرجال والتقليل منهم، خاصةً بعدما تداول رواد مواقع التواصل الاجتماعي مقطع فيديو للإعلامية، نصحت فيه إحدى متابعات برنامجها بحظر رجل كانت مرتبطة به عاطفيًا، قائلةً: "اعمليله بلوك".

ونشرت حسن، مقطع فيديو عبر صفحتها الشخصية على موقع التواصل الاجتماعي "فيس بوك": "الهوجة دي إحنا مش واعيين مدى خطورتها علينا، البنت اللي بتعمل بلوك للرجالة، وبتدخل جروب إحنا بنكره الرجالة، إحنا أساسنا راجل، لولاه مكناش جينا، وكل واحدة فينا في حياتها راجل سواء حبيب أو أب أو أخ أو صديق، بتعتمد عليه". 

وأضافت: "أول ما بتعملي حادثة بتروحي لراجل، ولما حد يديكي على قفاكي بتروحي لراجل". 

وتابعت: "اللي بنقوله في حق الرجالة عيب، وأنا مقبلش حد يقلل من كرامتي أو قيمتي، وبعدين يا حبيبتي منك ليها بتعملي إيه للراجل علشان تستني منه اللي هو بيعمله، أي راجل محتاج روقة، لو أنتي روقة هيكون أبو كمال، غير كده متزعليش". 

وأكملت: "ولا عاوزينا نعمل زي صبا مبارك في مسلسل العهد، ونعمل كفر للنسوان، وفي الآخر تتجوز أحمد العوضي، ولها حق الصراحة". 

ونصحت الفنانة الشابة، الفتيات بألا يتبعن نصائح "الشربيني": "رضوى يوم ما هتلاقي راجل محترم وابن ناس مش هتقول لأ، خليكي حنينة الراجل هيبقى خاتم في صباعك". 

وأثار مقطع الفيديو، الذي نشرته مي حسن، جدلًا واسعًا بين المتابعين، حيث دافع الرجال عن وجهة نظرها، بينما لم يلق ما نشرته قبولًا بين متابعات الصفحة. 

وكتبت راوية السعدني: "هى دي دعوة منك لإيه بالضبط كوني محترمة عندك حياء وعندك كسوف، واتقي ربنا سوف يرزقك من يتقي الله فيكي، مش شرط تكوني رقاصة أو عشيقة علشان يكون هو ابو كمال، لأن أبو كمال تاجر مخدرات علشان كده كان لازم تبقي في حياته عشيقة أو رقاصة، كل واحد بياخد الشبه بتاعه يعني اللي عايزاه تبقي روقة، لازم تاخد أبو كمال حوار سطحي نتيجة غياب العقل والعلم والدين". 

وكتبت ياسمين سليمان: "أختلف مع حضرتك لأن كل الناس بتقول إن رضوى بتقوم الستات على الرجالة، وده مش حقيقي هى بتبقي بترد على مشكلة فردية لواحدة واحد مبهدل كرامتها وكل شوية يسيبها ويرتبط، ويرجع تانى مثلا فطبيعي حضرتك شخصيا مش هتقبلي على نفسك كده، هى مش بتعمم ياريت نتفرج على الحلقات كاملة قبل ما نحكم، لإن إحنا دلوقتى اللى بنظلم".

وكتبت أسماء أبو طالب: "عايزه أقولك حاجه كمان حقيقي برافووو عليكي كسبتي كل الرجاله في صفك، زي ما رضوي كسبت كل الستات في صفها، أنتي غيورة موت".

وقالت إسراء مصطفى: "طب ما أنا روقة والله واسمي رؤى وبرضو مفيش فايدة، ياحاجه كلهم شبهه بعض وربنا". 

وعلق محمد سليمان: "والله العظيم أنا شخصيا فخور بكلامك يا ريت توعيهم عشان ضايعين فكرا". 

وكتب أحمد الشرقاوي: "تسلم دماغك يا فنانة، والله أنا بالنيابة عن الرجالة كلهم بقولك إحنا بنحبك أنتي برنسيسه". 

وقال محمد السيد: "الله يفتح عليكى أنا كنت قلت خلاص الستات كلها اتجننت، الحمد لله إن لسة فيه ستات عاقلة، العقل حلو برضو ولازم نوازن بين كل شيء لا إفراط ولا تفريط". 

وكتب محمد الأسواني: "والله عسل وكلامك ميه الميه الميه وجدعة، وجبتي من الآخر ربنا يحفظك يا قمر". 

وعلق بيتر: "فعلًا خارجه من بيت راجل اتربيتى على الأصول".

أخبار قد تعجبك