حرصت الفنانة رانيا فريد شوقي، على التعليق حول ظاهرة الطلاق والنتائج السلبية التي تعود على الأطفال بعد الانفصال، وذلك عبر صفحتها على "فيسبوك".

وكتبت عبر صفحتها متسائلة: "ليه لما بيحصل انفصال بين الأب والأم بتيجي النتيجة على الأولاد؟ ليه الأب لما تبقى الأم هي اللي طلبت الطلاق بيعاقبها؟ وحتى لو هو اللي طلق يقولها شيلي بقى عيالك ويروح هو يعيش حياته كأنهم مش عياله".

وقالت: "مش بس كده بيذلهم على الفلوس كأنهم بيشحتوا وبيعقدهم تجاه أمهم وكأن مسؤوليته انتهت مع الطلاق، وخصوصًا لما تكون الست بتشتغل يقولك ما هي معاها فلوس تصرف على عيالها بقى، مش هي اللي عايزة تمشي واللي يضحك إنه يروح يتجوز ويخلف تاني، مش لما تشيل مسؤولية عيالك الكبار تبقى تروح تخلف وتزود ضحياك، الأمثلة دي كتيره للأسف واللي بيدفع التمن الأولاد".

وتابعت قائلة: "وبعد كده نشتكي من المجتمع وقلة التربية واختفاء الإنسانية، والأغرب إن في أمهات كمان بتسيب عيالها للأب وهم في سن صغير أوي محتاجين الأم أكتر، أو تاخد العيال وتعتبرهم منجم الدهب اللي هتقلب بيه فلوس أبوهم وتستغله، وإلا هحرمك منهم وهكرهم فيك و تبالغ في طلباتها".

واستطردت قائلة: "إن التفكك الأسري هو عامل أساسي في الجرائم والأمراض النفسيه والعنف والخيبة اللي بقينا عايشين فيها وعمالين نشتكي، والسخرية إن هما دول أكتر ناس حاسه إنها مظلومة و بتشتكي من البشرية للأسف، المشكلة مننا فينا والله الواحد بيشوف و بيسمع مأسي توجع القلب وأولاد بيقطعوا قلبك مالهمش ذنب غير سوء اختيارنا في اختيار شريك الحياة اللي بيصبح أب أو أم و لكنه لا يستحق أو تستحق اللقب".