بطرق مختلفة يصعب على الأمهات تنفيذها مع أطفالهن، نشر الدكتور هاني عصام، أحد أطباء الأطفال، على صفحته بموقع "فيسبوك"، فيديوهات يوضح فيها كيفية التعامل مع الأطفال حديثي الولادة بمختلف أوضاعهم، والتي تعد معضلة كبيرة بالنسبة للكثير من الأمهات ممن تخشين التعامل مع أطفال بشكل مباشر خوفًا من إصابتهم بأذى.

"شرقة الطفل بعد الرضعة، وإزاي تسكتي طفل بيعيط، وإزاي تحمي طفل حديث الولادة، كيفية تغير الحفاضة للطفل بسهولة"، كل هذا وأكثر عرضه الدكتور هاني في فيديوهاته عبر صفحته.

ورغم التعليقات الإيجابية التي يشهدها الطبيب على الفيديوهات المنشورة من قبل الأمهات، لكنه يتعرض أيضًا للكثير من التعليقات السلبية، والتي تشكك في خبرته كطبيب، نظرًا لصعوبة الحركات التي يقوم بها ويطالب الأمهات بتنفيذها.

علقت خلود واكد، على أحد فيديوهات الدكتور قائلة: "والله انا ممكن اسيبه يعيط بس معملش فيه كدا دا ممكن يقع مني أو اوجعه انت بتقول ايه".

في حين كان رأي أسماء محفوظ، "انا طول الفيديو بصوت وربنا وأقول كفاية لا إراديا.. أنا قلبي اتقطع ع البيبي أقسم بالله.. في حد يمسكه كده ويدعك فيه جامد كده ويعمل في البيبي الصغنون كده.. دكاترة الأطفال دول بيبقوا قاسيين قوي والله". 

وقالت نادية إسماعيل، "على فكرة اللي بيعمله ده صح هو بس علشان دكتور أطفال فمتمكن من مسكته مش عارفه الناس اللي بتقول ده لسه صغير انتو مشوفتوش الممرضات بتعمل إيه مع الولاد ولا الدكاترة بيبقوا موجودين في غرفة العمليات".