طبعا اللي يعرفني كويس هيعرف إني ملكة النقد والانتقاد، ولو غلط كدة وبقيت ملاك ومنتقدتش العيشة واللي عيشينها بنقد نفسي عادي جدًا.

كلنا هذا الناقد، بس الحقيقة الغالبية العظمى منها ناقد لغيره وشايف نفسه ملاك، والكلام ده مش عليا وعليكوا بس، الكلام ده بعد قراءة للتاريخ ظهر أنه طبيعة بشرية.

كان فيه حكاية من تاريخ عصابات نيويورك عن مجرم قاتل رهيب، لما قبضوا عليه وقرروا يعدموه بالكرسي الكهربائي، كان بيقولهم جملة واحدة بس: "تحت هذا المعطف قلب مضطرب لكنه طيب.. قلب لا يستطيع أن يؤذي أحد"، الراجل قتل نص البلد وكان بيتفنن في قتلهم طول الوقت؛ بس مكنش شايف نفسه شرير ولا يستاهل الشنق، ده إحنا بالظبط وإحنا بنتقد كل اللي حوالينا.

في الكتالوج بقى، هتلاقي الموضوع بيتلخص في الآتي:

وانت بتنقد بص لنفسك في المراية، هتلاقي إيه، هتلاقي إن محدش أحسن من حد وحتى الفعل اللي أنت بتنتقده دلوقتي، هتلف بيك الأيام وتلاقي نفسك في نفس الموقف، ومن غير ما تحس ولا تعرف هتتصرف بنفس الطريقة اللي انتقدتها وقلت عليها غلط.

اعرف إنك وأنت بتنقد شكل أو طبع حد، إن فيه اللي مش عاجبه شكلك واللي بالنسبة له طباعك دي غلط في غلط.

وانت بتنقد بص لنفسك في المراية عشان هتلاقي إنك بتتحول للحاجة أو للشخص اللي أنت بتنتقده.

عشان كدة؛ الكتالوج المرة دي مش هيقولك تعمل إيه، الكتالوج موجود بس عشان يفكرك بالمراية اللي هتقولك تعمل إيه قبل ما تنفذ، النقد مهم بس لو طلع بالطريقه الصح مش لو طلع عشان يثبت إن أنا الصح والناس كلها غلط.