جوائز وألقاب مختلفة أطلقها كثير من «الجروبات» الخاصة فى موقع «فيس بوك»، كنوع من تحفيز السيدات على ممارسة أنشطة مختلفة والتفوق فيها كالطبخ والرياضة، منها مسابقة «أجمل مزة» التى أسستها إيناس طه، صاحبة فكرة جروب «اجرى مع إيسو»، لأكثر سيدة نجحت فى فقدان وزنها، والتزمت بمواعيد تمارين الجرى الصباحية التى تقودها مع السيدات يومياً لمدة ساعة فى منطقة الشيخ زايد.

تشجيع السيدات على ممارسة الرياضة، خاصة اللاتى لا يذهبن إلى الجيم، بجانب استقبال اليوم بطاقة إيجابية من خلال استنشاق النسيم بالسير بين الشوارع صباحا، هو هدف «إيناس» التي نجحت فى جذب أكبر عدد من السيدات منذ تكوين الفريق قبل 6 أشهر: «بدأت الفريق لوحدى وكل مرة العدد بيزيد خاصة إنى اكتشفت إن فيه ستات كتير بتبقى عايزة تمارس رياضة وبتحب المشى لكن محتاجين اللى يشجعهم».

يوم 15 من كل شهر، الموعد الذى خصصته «إيناس» لتقيس أوزان عضوات الفريق وعددهن نحو 50 سيدة، تختلف أعمارهن بين المسنات والشابات: «بوقف كل واحدة على ميزان فى مكان تجمعنا، وبحسب عدد الكيلوهات اللى خسرتها خلال الشهر، وأكتر واحدة خست بتفوز بجائزة أجمل مزة».

المبلغ الذى يتم تجميعه من كل فرد فى الجروب يحدد نوعية جائزة الفائزة بلقب «أجمل مزة»: «الجايزة بتبقى أكتر حاجة الست محتاجاها، ممكن تكون طقم حلل تيفال أو كوليه أو حلق أو عمل جلسة تنظيف للبشرة مجاناً». لم تتوقف هدايا «إيناس» لتشجيع السيدات على ممارسة الرياضة على هذه المسابقة فقط، بل أول سيدة تصل إلى مكان التجمع فى الميعاد المحدد يكون فى انتظارها زجاجة عصير «فرش» وعبوة لبن هدية لها: «الموضوع اشتهر جداً عندنا فى زايد وبقى بينزل معانا أطفال وفيه رجالة دلوقتى بتطلب تنضم لفريقنا».