كافيه البنات
كتالوج الحياة

كتير مننا لا بيفهم معنى اللي حصل حصل ولا أصلا بيعدي في دماغه المبدأ ده، يعني أنا واحدة من الناس دخلت علاقة ماكنتش في البال وانتهت فجأة، وأنا لسه لغاية دلوقتي عماله أسأل وأندم وأفكر وأقول "يا ريتني.. طب كنت عملت.. طب ماكنتش رحت ولا جيت.. نسيت تماما إن اللي حصل حصل وخلاص".

وأنت ماشي في الشارع وقعت، هاتعمل إيه هتقوم وتكمل مشي، واحد كسر عليك الطريق وجري هاتعمل إيه ما هو اللي حصل حصل خلاص، طب هو الكلام ده ليه كتالوج أو داخل في الكتالوج هو كمان.. أيوه داخل جدا ومن أساسيات الحياة كمان.

خلينا نتفق وأنا معاكم إن اللي حصل حصل وخلاص ونسيب فكرة ليه وإزاي وإمتى ويا ريتني تحديدا، عشان دول مش حاجة أكتر من أنهم عوامل تعطيل وتدمير في أوقات كتير، وتضييع وقت ملوش أي لازمة ممكن نستفيد منه في حاجة تانية خالص.. أيوه اللي حصل حصل اللي بعده بقى عشان مافيش وقت.

أيوه أنا بكالم نفسي قبل أي حد بيقرأ الكتالوج، أنا على فكرة بتعلم لسه، أنا خلاص دخلت العلاقة اللي خلصت فجأة واتوجعت وندمت وسألت وزعلت وكل الألعاب دي، إيه بقى الحياة هتوقف، أكيد لأ ما هو أنا لسه عندي مراحل تانية كتير في عمري وهادخل علاقات تانية كتيرة لحد أما ربنا يريد ويدبسني وهايبقى برضو ساعاتها في مرحلة اللي حصل حصل بس هانخليه حلو وفي مصلحتنا.

ياريت نقبل فكرة إن اللي حصل حصل وخلاص ونفتح صفحة جديدة، أصل اللي حصل ده كده كده كان هيحصل دلوقتي أو بعدين عشان مكتوب، تخيلوا الأجانب عملوا فيلم اسمه click بطولة آدم ساندلر كانت الفكرة إنه يحارب مبدأ اللي حصل حصل بريموت كنترول يرجع فيه أحداث ويقدم أحداث، بس لما اتحكم هو في أحداثه اضايق أوي وحاسس إنه لأ مش لاعب أنا هسيبها كده زي المكتوب، واللي يحصل يحصل.

الغرب الكفرة اللي بننتقدهم ليل نهار عرفوا إنه مش حلو يغيروا المكتوب ولا صح يقفوا عند اللي حصل، وإحنا اللي قايمين نايمين في التدين مش عارفين نقبل ولا نعرف ولا عارفين حتى نتصرف.. لأ لازم نتصرف ونسيب اللي حصل ونركز مع اللي هايحصل ونتدرب إزاي نتقبل اللي بيحصل وإنه كده كده هايحصل.

الكلمات الدالة

أخبار قد تعجبك