كافيه البنات
كتالوج الحياة

فيه ناس بتحب الحياة.. وناس بتكره الحياة.. وفيه ناس عايشة الحياة.. وناس مش عايشة معانا الحياة.. وناس بتتمنى الحياة.. وناس بتتمنى الموت.. وناس بتتمنى يكون لها حياة.. وناس أصلا مش فاهمة الحياة.. وفيه اللي مش عارف الحياة واللي ناسي الحياة واللي مش فارقة معاه الحياة.

فيه ناس عمرها 20 سنة 30 سنة 40 سنة وعملت حياة.. وناس عمرها 50 و60 و80 و100 سنة ولسه مش مجمعة الحياة.. كل الناس دي وإحنا معاهم عايشين في نفس الحياة وعشان وعشان كل الناس قررنا نشرح سوا كتالوج الحياة.. أيوا كتالوج الحياة. ما هي الحياة كمان ليها كتالوج.. زي ما التلاجة والغسالة والتليفون وحتى الفلاشة ليها كتالوج، فيه تعليمات واحدة مهما كانت الماركة مختلفة، وطريقة تشغيل واحدة، بينزل معاهم كتالوج فيه كل التعليمات والتحذيرات بس بكل اللغات.

الحياة كمان ليها كتالوج فيه نفس التعليمات والتحذيرات، أو نقدر نقول نفس القواعد والأصول بس بلغات مختلفة، وكل اللي بيفرق بس طريقة الاستخدام "اللي نقدر نقول عليها العادات والتقاليد".

المعروف عن البشر أول ما بيشوف الكتالوج إنهم بيتقسموا كالآتي، "اللي بيقرا الكتالوج ويفهمه وينفذه بحذافيره.. واللي يقرا ومبيفهمش أوي فينفذ بالشبه البورم اللي بيرمي الكتالوج عشان أصلا مش محتاجه هو بصباع رجله الصغير هيشغل أي حاجة، وفيه اللي بيخلي الكتالوج ده وقت الطوارئ لو احتاج الصيانة أو حس إن الدنيا بتبوظ، وفيه اللي بيرمي الكتالوج ويستعين بصديق عنده نفس الحاجة أو عدى بنفس التجربة يديله الخلاصة، المهم إنه اللي قرأ الكتالوج وفهمه الحاجة بتعيش معاه أكتر والأنواع التانية المهملة الدنيا بتبوظ منهم بسرعة وبيفضلوا يسألوا أنا إيه اللي عملته غلط وليه بيحصلي كده".

عموما إحنا هنحاول نتجنب التخبيط ونقدم كتالوج بسيط ومختصر للحياة، أكيد فيه أساسيات وفيه كمان تجارب الآخرين، لأن إحنا دايما نحب نتأكد إن الحاجة دي كانت متجربة، والكتالوج هيكون متقسم طبعا عشان ميحصلش أي لخبطة ونبقى إحنا اللي لخبطنا الحياة، بس نقدر نقول إن كتالوجنا هيكون فيه "العلم والتعليم، الحب والمشاعر، العادات والتقاليد، العلاقات الاجتماعية، الآخر وعلاقتنا بالآخر"، استنونا كل يوم سبت وثلاثاء مع كتالوج الحياة..

الكلمات الدالة

أخبار قد تعجبك