رئيس مجلس الادارة:

د. محمود مسلم

رئيس التحرير:

مصطفى عمار

رئيس مجلس الإدارة:

د. محمود مسلم

رئيس التحرير:

مصطفى عمار

علاقات و مجتمع

محاربة سرطان لـ"هن": "خضعت لـ6 أنواع كيماوي.. وزوجي طلقني عشان المرض"

كتب: نرمين عصام الدين -

03:33 م | الخميس 03 أغسطس 2017

روضة محمد

"5 سنين زواج.. وطلّقني لإصابتي بالسرطان.. وكافحت المرض لوحدي".. الحديث لمحاربة إسكندرانية اسمها روضة محمد، 25عاما، انتشر المرض الخبيث في أجزاء من جسدها في بداية 2014 وعانت منه لسنوات.

"هن" التقى بالفتاة المنتقبة، واستمع لقصة حربها كاملة ضد آلام المرض ومواجهة زوجها، الذي تخلى عنها وابنتها في اللحظات الحرجة.

تقول: "مكنتش أعرف إني مصابة بالمرض..  بلغوني في الأول أنه ورم حميد وبعد ما أتعالجت عرفت إنه سرطان، كان في المبيض وانتشر في الرحم والغشاء البريتوني والحوض، أخدت كيماوي وعملت عملية استئصال رحم، وشالوا جزء من الغشاء والمبيض والرحم، ثم قسطرة في البطن، كانت صعبة جدًا بس كانت السبب في الشفاء".

وأضافت: "المرض رجع تاني في الحوض، وانتشر في المهبل وكنت أصاب بنزيف شديد، بقالي سنة ونص بتعالج، وأخدت 6 أنواع كيمياوي، وأصعبهم الأخير ومكنش ليه فايدة، وكنت كل ما أخد نوع، يرجع المرض بأقوى مما كان، والورم بيكبر وأشرس وبينتشر أكتر.. كنت بموت".

تتذكر روضة مضايقات زوجها "في أول إصابتي كان حاسس بالذنب وكان بيروح معايا للدكتور، وبعد ما كانوا أهله بيزنوا عليه يطلقني، ويعملوا المستحيل في نجاح ده، وهو بيسمع كلامهم بشكل مش طبيعي، وكان بيخلق المشكلات باستمرار وتخلى عني وعن بنته، وتعبت جدًا، والورم عمل تضخم جامد في الكلى، ومناعتي قليلة جامد، وجسمي تعبت من الكيماوي ومن الكوتيزون، وسلمت أمري لله لأني أخدت بأسباب الأرض والأطباء".

ألم المرض وسوء المعاملة، صاحبهما ألم نفسي شديد، توضّح: "أهله كانوا بيقولوله إنت هتعيش على بنت واحدة اللي هي بنته، فكانوا بيضغطوا من كل النواحي، وكلامهم بيأثر فيه جدَا، وأوقات كان بيعترف بقيمة بنته وبيته ولكن سرعان يتغير الكلام".

تحكي لحظات النهاية "انفصلت في 2016، بعد زواج 5سنوات، وتنازلت عن جزء كبير من حقوقي عشان انفصل، والموضوع مش نهاية العالم، وعرفت أننا كمحاربات بنعاني من مشكلات كثير من الكبار والصغار، حتى كانت محل أحدايث في صالة انتظار الطبيب، والست عندها أصل كبير عن الراجل في الموضوع ده ومعظمهم بيعتقد في نفسه أنه تحمل الكثير بالرغم أنه واجب على أي زوج الالتحام مع زوجته في الأزمات".

الكلمات الدالة