ميادة، ومروة، ومها، ثلاث شقيقات، يفتتحن "بنات خانة"، بالمنوفية من أجل الترفيه، وحرية المناقشات ذات الطابع الأنثوي والأمومي، منذ شهرين، لينشغل بهن الطالبات والفتيات من مختلف الأعمار وكذلك الأمهات باصطحاب أطفالهن.

تقول مروة السيد، باحثة في علوم البرمجة لـ"الوطن": "بنات خانة يعنى مكان للبنات اللي هو أول كافيه بالمنوفية بشبين الكوم، والفكرة جتلنا في إننا عايزين مكان نشعر فيه بكامل راحتنا من تصرفات، ومناقشة أفكار بعيد عن أي أحاديث أو تحكم ممكن يكون مزعج أو مُحرج للخصوصية، وأخدنا نصيب من الهجوم بشكل كبير ولكن إحنا مردناش على أي هجوم لإن ده بمثابة دعاية ليهم، وعايزين نوصل بالمكان للأول في ترتيب كافيهات البنات".

وتستكمل: "عندي مكتبة صغيرة للكتب والروايات، وفيه بنات بتيجي للقراءة لأن المكان الهادئ بيساعد على التركيز، وممكن تيجي البنات عشان تذاكر فقط، بالإضافة لمكان بيشمل الجديد والافتكاسات زي البطاطا والذرة المشوي".

تقول مروة: "كان نفسي كل العاملين بالمكان يكون من الفتيات فقط، وده محصلش لإننا عندنا في المنوفية قلة في البنات اللي بتشتغل في المجال، ولكن مؤسس المكان بنات وموجه لهن".

وعن الهجوم الذي يتعرض له المكان، تقول شقيقتها ميادة السيد، باحثة في القانون الجنائي: "في مجموعات على( فيس بوك) في المنوفية كتبوا كلام مالوش أي أساس من الصحة بإن المكان وحش وأنه فيه شيشة وإن صاحبة المكان مدوراه وكانت بتشيش وده أصلا مش حقيقي، ودي من ضمن الصعوبات اللي واجهناها، ومعنديش شيشة في المكان أصلا، والمكان في مشروبات وكتب وروايات وموسيقى هادئة، وألعاب زي الطاولة والكوتشينة والشطرنج، والدومينو والأونو، ورغم إن الفكرة مقبولة من ناس كتير، فيه ناس تانية بتقول بنات بس إيه ياترى أيه اللي بيحصل في المكان".

وترى مها إن ألوان المكان ساعد على إقبال الفتيات والنساء بأطفالهن على المكان، لما به من تناسق والذي ينعكس براحة على العين: "ده ساعد الأطفال هنا على الرسم والتلوين، وتقليد اللوحات، أنا كنت حابة أخلي الأطفال ينموا مهارتهم أكثر من إنهم يلعبوا".

وعن المقبلات على "خانة بنات"، تقول منة علي: "المكان آمن ومريح للفتيات، كونك إنك بنت وموجودة فى مكان للفتيات، فبيساعد أكتر على احترام الخصوصية، والعالم الخاص بيكي".