تسللت إلى قلوب الملايين ببساطتها وخفة دمها، وفي غضون 5 سنوات فقط باتت الأشهر فى عالم الطبخ، بعد أن دمجت خريجة كلية التجارة بين عشقها للآلة الحاسبة والأكلات، وأطلت على الجمهور ببرنامج تكلفة وجباته رخيصة «على قد الإيد»، طموح نجلاء الشرشابي ابنة مدينة «طنطا» لا حدود له، حاولت أن توازن بين بيتها وعملها لتصبح أماً ناجحة وجدة حنوناً وواحدة من أشهر الشيفات.

أين كنت قبل 5 سنوات؟

- كان عندي محلات هدايا ولعب أطفال، حققت شهرة كبيرة، وكنت مبسوطة جداً بنجاحها، لكن اضطريت أقفلها بعد تقديمي للبرنامج بسبب ضيق الوقت، ومن قبلها كان عندي حضانة، كنت بسيب فيها أولادي وفي نفس الوقت بشتغل، لأني ما بحبش أقعد فاضية، ولما ولادي كبروا قفلتها.

من صاحب فكرة برنامج «على قد الإيد»؟

- منتج البرنامج سامر الجمل، ورحبت جداً بالفكرة لأنى من زمان بحب أعمل أكلات موفرة، وكنت بشجع أصحابي على التوفير، ولما بدأ البرنامج على قناة «سي بي سي سفرة»، كنت بعمل مصروف للحلقة، أفتكر مرة كان 100 جنيه، ولا يمكن المكونات كانت تعدى المبلغ المحدد، بل أحياناً بتكون أقل.

كيف توازنين بين البرنامج وبيتك؟

- زوجى محمد سليمان واقف جنبى فى كل خطواتى وبيشجعنى جداً، ولأنه مطلع جيد وبيحب القراءة بيمدنى بمعلومات كتيرة، وبيتابع البرنامج كل يوم وينبهنى لو غلطت فى أى معلومة.

وماذا عن أبنائك؟

- ولادى كبروا، عندى عبدالرحمن خريج حاسبات ومعلومات، إسراء متزوجة وعايشة فى الخارج، عبدالرؤوف خريج حاسبات ومعلومات، وسندس أولى إعلام، وكلهم بيتابعونى وبيشجعونى دايماً.

الطبخ بدأ هواية أم تعلمته بشكل احترافى؟

- أنا تقريباً مولودة فى المطبخ، كنت بحب أقف أتفرج على أمى وأمهات الجيران، وأفتكر إنى بدأت فى عالم الطبخ بالعجين وعملت الكحك والبسكوت فى العيد.

هل تفكرين فى إنشاء أكاديمية للطبخ؟

- أكاديميات الطبخ كويسة للمبتدئين، مرة عملتها لكن وقتى ضيق كان بيضيع فى المشوار، بس فى بالى الموضوع وهعمله تانى لو تيسر.

ما أبرز المواقف المحرجة التى تعرضت لها على الهواء؟

- العيال الصغيرة بتتصل وتشتم.. فيه موقف مضحك جداً حصلى، واحدة كلمتنى واشتكت من حماتها، وحماتها اتكلمت واشتكت من مرات ابنها، دى كانت حلقة غريبة والجمهور تجاوب معها.

لماذا تحرصين على تقديم نصائح عامة خلال البرنامج؟

- الناس بتحب تسمع حكايات ونصايح جنب الأكل، كنت بعمل كده فى الحلقات المسجلة، ولما بقيت أطلع على الهواء مباشرة لقيت رد فعل الناس لطيف جداً، وفيه تفاعل كبير مع أى موضوع بنتكلم فيه من الكبار والصغيرين، وده ما يمنعش إن فيه ناس معترضة على الفكرة.

هل يتابع أحفادك البرنامج؟

- أحفادى «ليندا وتمارا» اتولدوا بره مصر فى «تشيكوسلوفاكيا»، ماكنتش موجودة معاهم للأسف، هما هاديين جداً زى النسمة، وبيحبوا يشوفونى، ويعرفوا أنا عملت إيه ولابسة إيه كل حلقة.. عيال حويطة.

هل تتابعين برامج الطبخ؟

- بتفرج على كل برامج الطبخ، وممكن شيف صغير يقول معلومة تضيف ليّا، لكن أكتر شيف بحب أتفرج عليه هو أسامة السيد.

أكتر حاجة بتحرجك؟

- الناس بتكون مبسوطة جداً لما يقابلونى فى الشارع أو فى الأسواق، وبيشوفوا أنا بشترى إيه ويشتروا زيى، وده بيسعدنى كتير، لكن أكتر حاجة بتحرجنى لما الناس تشوفنى وأنا بشترى أكل جاهز عشان وقتى ضيق، ومش هلحق أروح أعمل أكل فى البيت، فبيقعدوا يضحكوا ويهزروا معايا، وأقولهم اعملوا انتوا الوصفات اللى بقدمها مش لازم أنا اللى أعملها.