تعالى كده نعرف كلمة مشاركة أو شراكة اللي بيجي منها كلمة شريك، أغلبنا كان مفهوم الكلمة بالنسبة له مقتصر على شريك الحياة وشريك البيزنس.

أنا طبعا كان مفهومي مختلف شوية، لأن المشاركة كانت بالنسبة لي فى الأكل، وساعات في البنزين، وحاجات مادية كده بسيطة بس بتفرق، المهم إن مفهوم المشاركة أتطور شوية مع وجود الفيسبوك، وبقى الـshare حاجة منتشرة أوي، بس الناس برضو مش فاهمة أوى، لأن الناس أما بيعجبها حاجة عندك، وتبقى عايزه تشيرها زي مابيقولو، يجوا يقولك ايه هاسرقها منك.

الحقيقة أما الواحد بيبقى محتار وعنده لخبطة كده يحب يلجأ للكتالوج، وبمنتهى البساطة الغرب قالوا إيه، sharing is caring جملة لخصت معانى كتير، المشاركة حلوة، المشاركة اهتمام، المشاركة مش مقصورة على بيزنيس وشريك حياة، المشاركة شاملة الكاملة، يعنى ممكن نتشارك فى الأفكار والمشاعر، وفى الأحزان حتى ممكن ننزل نشارك بعض فى فنجان قهوه، يعني اكيد كل واحد هيجيب قهوته بس قصدى ننزل نشرب حاجة عشان عندنا حاجة مشتركة بينا وبنحبها وعايزين نتكلم فيها.

أما كتبت الكتالوج لاقيت ناس كتير بتشاركنى نفس المشاعر وعايزه تتكلم معايا عشان عندها نفس الفكر، أما نزلت من البيت ولاقيت الدنيا زحمة واتعصبت لاقيت ناس كتير بتشتكى من نفس الموضوع وحاسه بيا وبتشاركنى الضيق، بس الكتالوج مقلش إنك تشارك بأن يكون عندك نفس الأحاسيس أو الحالة وخلاص، لأ بيقولك إنها حلوة، ازاى عشان أما اتنين أو تلاتة أو خمسة عندهم نفس الحالة بيبقوا عايزين يوصلوها لأكبر عدد عشان يستفيد خصوصا لو كانت الحاله بعيد عن العصبيه يعني، لو كانت الحالة دي حالة حلوة أو إيجابية.

يعنى أنا لاقيت أن للحياة كتالوج ممكن يفيد ناس كتير، حتى لو بمجرد إنه يمس جواهم حاجة مكبوتة ومكنوش عارفين يطلعوها ازاي فبدأت من عندي وشاركتهم كتالوجي وعرفتهم إن سهل إن كل واحد يعمل كتالوج لحياته ويمشى عليه.. شارك.. المشاركة اهتمام.. المشاركة حياة.. المشاركة حلوة مافيش كلام.