"رسالة لأهل الخير.. بنتي نورهان بدل ما أفرح بشهادتها في الثانوية العامة، دايخة على علاجها كعب داير".. بتلك الكلمات تناشد زينب محمد، أصحاب القلوب الرحيمة لعلاج ابنتها، من كسر ساقيها والعمود الفقري بعد سقوطها في الطابق الرابع أثناء تعليق ستارة. 

تقول زينب، لـ"هن"، "كنت مستنياها تكبر وتسندني، وقعت ومبقتش قادرة تتحرك.. محتاجة أعالجها.. محتاجة مساعدة مالية أكمل تمن العملية.. نفسي أشوفها واقفة على رجليها تاني زي الأول"، موضحة، "لسة بنت في عُمر الورد، 16 سنة قالتلي ياماما هعلقلك الستارة بتاعة البلكونة، قلتلها لأ اقعدي ذاكري ونزلت".

وتستكمل، "كلموني أهل الحتة وقالولي نورهان بنتك وقعت من البلكونة وهي بتعلق الستارة، قلبي وقع في رجليا وجيت جري وكلمت أبوها عشان نلحقها، بس كانت فاقدة الوعي خالص".

رحلة علاج وتبرعات شاقة سارتها أسرة صغيرة منذ أسبوع،  على المستشفيات العامة، طالبين إنقاذ حياة ابنتهما، وعن ذلك تقول الأم، "روحنا القصر العيني، قالولنا محتاجة عملية تثبيت فقرات، لأن عندها 3 فقرات بالعمود الفقري مكسورين، غير الكسر المضاعف بالساقين، فضلًا عن انفصال لحم كعب قدميها.. ولما طلبنا يعالجوها قالولونا لسة مفيش مكان دلوقتي".

بدموع الحسرة، تؤكد "زينب" أن جيرانها وبعض الجمعيات الخيرية تبرعوا بمبلغ قيمته 75 ألف جنيه للعلاج، إلا أن مصاريف العملية ستتكلف 120 ألف جنيه، وتشير، "بنتي في أحد المستشفيات القريبة منا وأبوها راجل ساعي على قد حالنا.. مستنيين فعل الخير ونكمل الـ 45 ألف اللي فاضلين عشان تقدر تقوم على رجليها من تاني".