أنا أنسة داخلة على الأربعين من مدة طويلة فقدت الأمل في الارتباط والتعلق برجل بعد خيبات أمل كتير اتعرضتلها وخطوبتين فشلوا وأخدوا من عمري سنين.. خلوني مبقتش أثق في أي راجل ولا أحس معاه بالأمان، وبدأت أحط كل همي في شغلي وأرسم لنفسي مستقبل بعيد عن الجواز والخلفة وحلم تكوين العيلة اللي كنت نسيته خلاص..

بعد دخولي التلاتين كتير من أصحابي البنات بعدوا عني بعد جوازهم بالبلدي كده "خايفين إني أخطف منهم أزواجهم" خصوصا إني الحمدلله على درجة عالية جدا من الجمال ومستوايا التعليمي والمادي كويس لكن "مفيش نصيب".. أنا كنت راضية جدا بحالي ومزعلتش منهم وفي الفترة دي كانت صداقاتي بالولاد أفضل.. "أحمد" كان من أقرب أصحابي ونعرف بعض من سنين وأعرف مراته وأولاده فجأة بدأت علاقتنا تختلف الاهتمام بي زاد وكل ميسافر يجيبلي هدايا ويحكي إنه لو عرفني زمان كانت حياتنا اختلفت غصب عني اتعلقت بيه ومعرفش ازاي بقيت بحبه رغم اني عارفة إنه متجوز وبيحب عياله قوي..

أنا مش خرابة بيوت لكن غصب عني.. مشكلتي دلوقت إني بحبه وهو بدأ يحس بده وبيبعد عني لدرجة إنه بطل يكلمني ويدوب لما أشوفه في الشغل يصبح وخلاص.. أنا مش عارفة أعمل ايه ؟

تصدقي يا "آنسة" أنا فاهماكي، وفهماكي أوي كمان، عارفة نفسية الواحدة لما تبقى مستكفية بنصيبها وعارفة وضعها وفاهمة اللي حوليها بيقربوا وبيبعدوا ليه، كلامك بيقول إنك ناصحة، وفاهمة التصرفات أصلها إيه؟ عارفة إن اللي بعدوا من صاحباتك خافوا على إجوازتهم منك، مش بس كدا دا انتي قدرتي كمان الموضوع ومزعلتيش منهم، واضح إن الوحيدة اللي مخدتش منك جمب، وإدتك مساحة أمان هي مرات "أحمد" وواضح كمان إن "أحمد" قام بالواجب وحب يستغل المساحة دي.الحلو في الموضوع دا إنك فاهمة إنه بدأ يهتم، لكن اللي معجبنيش في الموضوع إن ذكاءك وعقلك عطلوا في النص يا حبيبتي، مسألتيش نفسك اهتم بيكي ليه "بجد" مش زي ما قالك، طيب مسألتيش روحك بدأ يبعد ليه لما لاقاكي ابتديتي تضعفي؟ ولا حاولتي تفهمي أصلا إنتي ليه حبيتيه مع إنك في أول الكلام قولتي بالمفتشر إنك بعد خطوبتين فشلوا "مبقتش أثق في أي راجل ولا أحس معاه بالأمان"، عاوز تفهميني إنك حاسة مع "أحمد" بالأمان؟ ولا حتى عمرك هاتحسي بيه !تحبي أقولك أنا إنتي جاية تسأليني هنا دلوقتي عن العمل ليه؟ عشان إنتي مابتحبيش أحمد، إنتي بتحبي حالة الاهتمام، والعناية، الشخصيات الناجحة والذكية اللي زيك مابيتحملوش الرفض، ولا بيقبلوا حد يصدهم، أحمد بالنسبالك مشروع وفشل، فكرك هاتبقي مبسوطة لما يقرب ويقولك بحبك، طاب لو قالك نتجوز هاتوافقي؟ إنتي مش مش عارفة تعملي إيه، إنتي مش عاوزة تعملي اللي المفروض تعمليه في الظروف اللي زي دي.

أنا مش هافضل أضربلك المثل بأمل كلوني اللي صبرت ونالت، ولا هاقولك الجواز الصح مالهوش سن لأنك أكيد فاهمة كويس أوي أوي كل الكلام الحلو والحقيقي دا، لكن هاسألك هو دا منتهى طموح واحدة زيك لو كانت عاوزة تتجوز أي جوازة والسلام من زمان كانت عملتها؟ هو دا اللي انتي صبري السنين عشانه؟ ربع راجل؟ ربعه مع مراته ونصه مع عياله؟ تصومي تصومي وتفطري على بصلة؟إوعي يغرك الهدايا يا حبيبتي والكلام الحلو، مفيش أكتر منه وحياتك.قدري الموضوع كمل، وجه قالك بحبك، وإنتي جيتي على ضميرك وسكتيه من ناحية مراته اللي هي صاحبتك، ومن ناحية عياله اللي أكيد لاعبتيهم وقابلتيهم في يوم من الأيام، قدري إنكم اتجوزتم وبقيتي ضرة صاحبتك ومرات أبو العيال، هاتبقي مبسوطة؟ لو هاتتبسطي يا "آنسة" أنا بقولك أهو اعمليها، لأنه لو معملهاش معاكي هايعملها مع غيرك، ولأنك مادام قبلتي تكوني "ضرة"، وقبلتي المبدأ هاتعمليها معاه أو مع غيره، بس طبعا مش محتاجة أفكرك إن قعدة الخزانة ولا جوازة الندامة، وإن اللي يلعب بالدح ما يرجعش يقول "أح".