في حلقتنا الأولى بنقدم لكم مشكلة صعبة شوية اقروها معانا.. اعرفوا معايا الحكاية الأولى وشاركونا بأرائكم،  

أنا منهارة ومش عارفة راسي من رجلي ساعدوني عندي مشكلة بجد ومش عارفة أعمل إيه فيها، دي حكايتي يا جماعة وبالله عليكوا قولولي إيه الحل أنا ست متجوزة بقالي 7 سنين ومخلفة بنتين وجوزي كان شغال مدرب في نادي، وكانت حياتنا زي أي زوجين حلوة ومافيش بينا مشاكل والحمدلله.

بدأت الحكاية معايا لما اكتشفت إن حاجات بتضيع من البيت بشكل غريب تختفي كأن عفريت شالها وأدور كتير ملقهاش.. الأول كنت بقول بنسى لكن بدأت أركز مع نفسي وولادي.. ولاحظت اختفاء الحجات زي ما يكون حد بيدخل الشقة من غير معرف، ومرة ﻻقيت الإكسسورات بتاعتي مش موجودة والحاجات الفضة بتاعتي مسروقة، في الأول ما شكتيش في جوزي خالص وقولت لنفسي استحالة يسرق البيت ومكنش باين عليه أعراض شرب أي بﻻ أزرق، لكن مع تغير تصرفاته معايا وكان بيرجع البيت متأخر وحسيت إن في حد في حياته واتأكدت لما لاقيت مواعيده مبقتش  زي الأول وشكيت إنه يعرف بنت تانية وبيصرف عليها وقلت يمكن بياخد الحجات يديهالها وافتكرت نزوة وهتعدي. 

وليلة وقفة العيد الصغير اللي فات جوزي وقع من على السلم ورجله اتكسرت وحصله تمزق في الرباط الصليبي وعمل عملية وقتها مكنتش عارفة أتصرف، واتخضيت لأن بعض الدكاترة قالوا ممكن يحصله إعاقة وحركته تكون صعبة قدام.. معرفتش أتكلم واحد مريض قدامي وسكت وحطيت جزمة في بقي رغم إن جوايا قلبي كان بيدعي عليه لكن جيت على نفسي عشان خاطر بيتي وولادي، المهم قبل العملية التانية جوزي اعترفلي إنه خاني وحكالي كل حاجة عن الست التاينة خاني معها وطلب مني أسامحه.. وفعلا قلت إن الله غفور رحيم وسكت وحاولت ألم الموضوع..  

بعدها بفترة بدأت أﻻقي مكالمات من أرقام غريبة ورسايل سافلة رديت على التليفون لاقيت واحدة بتهددني إنها تنشرلي صور على مواقع إباحية وصور خاصة وبدأت تحط رقمي في صفحات قلة أدب وتجيني تليفونات قبيحة.. وفأة لقيتها جيالي البيت وبتقولي عايزة فلوس وكذا وكذا وإلا هتفضحني.. مكنتش فاهمة أي حاجة إلا لما بعتتلي صورة اتصدمت وافتكرت إن الصور دي كانت على تليفون لي في البيت قلبت عليه الدنيا في الشقة ملقتهوش.. واجهت جوزي وقالي إنه جابها شقتي وإنها أكيد سرقته من شقتي

أنا هتجنن دماغي مشلولة مش عارفة أعمل ايه.. حسبي الله ونعم الوكيل.. قولولي بالله عليكم أعمل إيه أنا من يومها عايشة تعبانة ومتعذبة. 

طبعا كلكم دلوقت بتقولوا يا ترى أنا حلتلها الموضوع ده ازاي ؟!

عزيزتي صاحبة مشكلة التليفون

أتمنى تكوني بخير، بصي بقى يا حبيبتي في مثل صعب شوية لكنه ينطبق على حالتك بالظبط، بيقول إيه؟ "النسوان مصايد والرجال تقع فيها"، مخبيش عليكي، إنتي الغلطانة من ساسك لراسك مرة لما دخلتي الحية بيتك وخليتي القط يمسك مفتاح الكرار، مرة لما عرفتي إن في حاجة غلط وطنشتي يا حبيبي ومرة لما خوفتي منها.. اه الراجل دلوقت تعبان واوعي تهدي بيتك طالما اعترف بغلطته لكن يا حبيبتي لازم هو كمان يدفع التمن و"من أتلف شيء عليه بإصلاحه" زي مدخلها بيتك مهمته يحميكي من الحية دي وغيرها يا قلبي.. اتكلمي معاه براحة وخليه يكلمها ويسجلها اعتراف وتاخدي التهديدات دي وتروحوا أنتوا الاتنين على القسم تعملوا محضر في الشرطة بضياع تليفونك وإنها بتهددك عشان دي واحدة ملهاش كبير، مش بس خطفت جوزك، عاوزة كمان تلهف فلوسك وتلبسك تهمتها، أهي دي بقى اللي المثل بيقول عليها "قال كلم الفاجرة تلهيك وتجيب اللي فيها فيك".

لكن معلش يا شابة، عاوزاكي من النهاردة تفوقي لروحك وماتخافيش، ولازم تتعلمي من اللي حصل، وإياكي غريب يهوب ناحية بابك، قالك كلب يحرس دارك وقط ياكل فارك ولا تحكي لحد أسرارك، تاني حاجة تردي عليها وتقوليلها إنك عملتي محضر واعرفي كويس هي صحيح خدت تليفونك، لكن ماخدتش تليفون جوزك، أهي الكورة في ملعبك يا شاطرة، دوري كويس أوي، لاقيتيلها صور وفيديوهات تبقى الملوخية جات تحت المخرطة ، وتبعتيلها حاجة منهم كدليل إنك ممكن تفضحيها زي ما بتهددك بالظبط، ولو ملقتيش برضو قوليلها إنك لاقيتي، صحيح إنتي أحسن منها وعمرك ما هاتعملي كدا، بس المثل بيقولك حرص ولا تخون، وأهي دي قصاد دي.

أنا أقولك بقى على المفيد، هتحتاجي وقت عشان تسامحي بجد من قلبك لكن أنتي لازم تتكلمي مع جوزك وتعالجوا الشرخ اللي حصل في علاقتكم ده.. ونصيحتي ليكي تروحوا لاستشاري علاقات زواجية عشان تقدروا تحطوا ايدكم على الجرح الحقيقي.. اوعي تتخلي عن جوزك وبيتك وولادك.. لكن لازم تتعلموا من الدرس القاسي ده كويس

فوتك بعافية يا حبيبتي