«الراجل مبيعيطش، مينفعش تبين مشاعرك وحزنك لحد، هتسيب إيه للبنات لما انت تعيط»، عبارات دائما ما يرددها الأهالي، لأبنائهم داخل البيوت المصرية، محاولين ترسيخ فكرة القوة والصلابة في مشاعرهم وتعاملاتهم مع الغير، وهو ما يخلق حالة من الجمود في العاطفة والمشاعر عند البعض، ليصبح مع الوقت شخصية منبوذة مرفوضة من المجتمع.

ومن جانبها، حددت صوفيا فرحان، طبيبة تخاطب ومؤسِسة مبادرة «راعي شعور ابنك»، خلال استضافتها في برنامج «جروب الماميز» العادات والمفاهيم الخاطئة في تربية الأطفال، إذ قالت: «جملة الراجل مبيعيطش خاطئة، قوامة الرجل بيحتوي زوجته في المستقبل، وبنقوله كده مينفعش تعيط ولا يكون عندك مشاعر، الطفل بيبدأ يحس إن مش من حقه يعيط وبيحس إنه بيعمل حاجة غلط ولا يزعل، بيضغط على الطفل نفسيا، فضلا عن عدم الاهتمام بمشاعر الآخرين».

الراجل مش من حقه يعيط

«أنا شقيان وطالع عيني في كل قرش عشانكوا»، جملة دائما ما يرددها الآباء داخل البيوت وفي خلافات الأسر، والتي تحدثت عنها صوفيا فرحان، خلال استضافتها في برنامج «جروب الماميز» قائلةً: «الكلام ده بيحس إنه مش من حقه يطلب من أهله أي طلبات، في أهالي بتذل ولادها بالكلام ده، لازم نقولهم قدراتنا المادية، مش مطلوب من الطفل يعرف إن أهله بيتعبوا علشانه، لازم نعلمهم يقدروا مجهود غيرهم، وتشجيعهم وتقديرهم لأبسط الأمور، هينعكس عليهم وعلى حياتهم».

مفاهيم خاطئة في التربية تتسبب في كوارث

وأشارت صوفيا فرحان، خلال اللقاء عن ذكر المفاهيم الخاطئة في تربية الأطفال، التي يعاني منها البعض داخل الأسر المصرية، قائلةً:«الطفل لازم يحس بقيمة اللي بيعمله علشان يثق بنفسه ويتشجع، الطفل بيستنى التشجيع من الأهل قبل الآخرين، لازم لما ييجي يكلمهم يفضوا نفسهم ووقت ليهم والمتابعة لكل حاجة وصلوا ليها».