كتب: غادة شعبان -
12:55 م | الخميس 25 نوفمبر 2021
سهام الانتقادات الحادة، كانت أسلحة النافذة في الهجوم القوي، الذي تعرضت له البلوجر آية مكرم، بسبب رد فعلها في مشهد حضور الفنان تامر حسني، زفافها متنكرا في هيئة مصور، ليفاجئها بالغناء في الحفل، إذ اتهمها رواد مواقع التواصل الاجتماعي، بالمبالغة وعدم تقدير زوجها في ليلة العمر، قبل أن تقرر عدد من البلوجرز وصديقات العروس، الدفاع عنها، من خلال سرد تفاصيل ما حدث، باعتبارهم من الحضور وشاهدين على ما حدث.
أعادت البلوجر آية مكرم، نشر شهادات اليوتيوبرز والبلوجرز، عما حدث في حفل زفافها ودفاعهم عنها، عبر خاصية «استوري» على موقع تبادل الصور والفيديوهات «إنستجرام»، إذ سجلت البلوجر مي البنا، مقطع فيديو يرصد تفاصيل الواقعة، قالت خلالها: «البنت اللي أنتوا قالبين السوشيال ميديا عليها، أطيب من الطيبة».
وتابعت مي: «غلبانة ولقت فنان كبير حاططها في دماغه، وعملها مفاجأة يوم فرحها مع جوزها، وزقت البنت قريبتها، علشان كان في هجوم على تامر حسني، لأن محدش كان عارف إنه جاي، قالبين الدنيا ليه؟ وإيه كانت مركزة معاه أكتر من جوزها دي؟ هو فنان محترم، وهي بتعشق جوزها، وكانت فرحانة إن هي بتحب فنان محترم كبير، وجالها فرحها، متأفوروش الله يباركلكوا، لازم الناس اللي كانت موجودة في الفرح تدافع عنها، ده الطبيعي».
علقت البلوجر مريم أحمد علي، على أزمة زفاف البلوجر آية مكرم، عبر خاصية «استوري» على موقع تبادل الصور والفيديوهات «إنستجرام» إذ قالت: «حطوا نفسكوا مكان آية، وتامر حسني حضر فرحك، صدقيني لو عارفة مش هيكون ده رد فعلك، هي لو كانت عارفة إنه جاي، أكيد كانت هتدرس رد فعلها كويس، وتفكر في كل خطوة وكل حركة، رد فعلها كان تلقائي لأنها اتفاجئت، وبالتالي اتنططت، كان في مشكلة في فرح آية، في قصة الهجوم عليها، وإنها زقت البنت، مكنتش مضطرة أطلع أتكلم في الموضوع، هي صعبت عليا، وأنها خارجة تاني يوم الفرح، وتبرر الهجوم اللي عليها».
البلوجر أحلام عادل، إحدى صديقات البلوجر آية مكرم، المقربات، التي كانت ضمن الحضور في حفل الزفاف الذي آثار الجدل، وعلقت عن الهجوم عليها خلال «استوري» على انستجرام، قائلةً: «أنا طبلة وصحابي مبيغلطوش، وفرحتهم من فرحتي وزعلهم من زعلي، واللي يمسهم كإنه أنا، آية بالنسبة ليا مغلطتش، بنت وفرحانة إن تامر حسني حضر فرحها، وقبل كده كانت تريند سابق معاه، ولما جالها عبرت عن فرحتها بشكل تلقائي، سيبوها تفرح، ونتمنى لبعض الخير، وبالنسبة للبنت اللي زقتها بنت أخت جوزها، متجوزة راجل جميل، ادعولها».
