زواج عن حب استمر نحو 3 أعوام، انتهى بعدما أقامت "هدير.م" 24 عامًا، دعوى خلع حملت رقم 1033/2018، ضد زوجها "إسلام.أ" 31 عامًا، لاستحالة العشرة بينهما.

خلافات مستمرة بين الزوجين تسببت في اتخاذ "هدير" قرار الانفصال، تروي الزوجة لـ"هن": "كنت بحبه من قبل الخطوبة وكنت مبهورة بيه لأنه أول شخص في حياتي وكان دايمًا يجيبلي هدايا ويعملي مفاجآت لكن من بعد الخطوبة والجواز اهتمامه بي أصبح معدوم وخناق طول الوقت وميعرفش يقول آسف ويعتذر زي الناس بيرجع يتعامل عادي جدا ولا كأن في حاجة أعصابي تعبت منه ومن بجاحته في الغلط وتعبت من كتر ما بقيت أسامح وأفرط في حقي".

قرار بالانفصال اتخذته الشابة العشرينية منذ فترة لكنها لم تنفذه حتى إنجاب طفلها الثاني، تضيف: "من أول الجواز حملت وجبت بنتي شهد بعدها على طول حملت مرة تانية خلال فترة الرضاعة وكنت تعبانة دايما ومجهدة ولما خلفت جوزي موقفش جنبي ولا حتى كان بيصرف علي بيسيبني عند أهلي بالشهر والاتنين مبيبعتش ولا مليم".

مطالبات له بالإنفاق وتحديد مصرف للمنزل تسببت في أزمة بين الزوجين، توضح: "من يوم ما اتجوزنا وأنا مجبتش حتى شراب جديد لدرجة إن أمي جابتلي بنطلونات جديدة هدية عشان لاقت بتوعي باظو وبتديني فلوس أشتري لبس لولادي وجوزي ولا هو هنا مفكرش يجيلنا أي حاجة.. بقيت أطلب منه فلوس يديني الربع لو طلبت 100 يديني 20 ويقولي معنديش واتفاجئ بيه جايب لنفسه موبايل جديد ومغير العربية تعبت من طريقته دي.. ولما طلبت الطلاق رماني عند أهلي ومسألش في فرفعت خلع عشان أخلص منه".