بعد أقل من عام من الارتباط، أقامت "ميرا.ع" 29 عامًا، دعوى خلع، حملت الرقم 1066/ 2019، ضد زوجها الثلاثيني "جمال. أ"، سبَّبَتها بـ"استحالة العشرة بينهما، بعدما اتهمته بأنه مصاب بالإحباط والاكتئاب".

أقل من 6 أشهر من الخطبة، وعقد الثنائي الرباط المقدس، لكن سريعًا ما دبت الخلافات الزوجية بينهما، كما تروي الزوجة لـ"هن": "من أول فترة الخطوبة وطريقة كلامه غريبة، سودوي دايما، وبيشوف الأمور بنظرة وحشة جدا.. عينه دايمًا تلقط السلبيات بس".

قلة التعارف بين الزوجين، سببت أزمة في الارتباط، حيث أوضحت: "كنت مركزة خلال الفترة البسيطة دي على حاجات جوهرية، ومأخدتش بالي خالص من فكرة السوداوية دي.. كان همي ميكونش بخيل ولا كذاب ولا خاين أو كده، وطبعا اتجوزنا بسرعة، لكن بعدها بدأت مرحلة الانتقادات اللي مبتخلصش، وأي حاجة حلوة تحصل، تقلب نكد، من النقد والسلبية".

خلافات عديدة بين الزوجين بسبب ما وصفته "ميرا" بالاكتئاب: "لو اديتيله وردة مفتحة حلوة كدا يرد بقولك للأسف اتزرعت بالمبيدات الحشرية، والناس مش بترحمها، ومش عارف إيه، مش يرد بكلمة كويسة، ويقولك الله دي جميلة ولونها حلو وريحتها جميلة.. دايما سلبي، يسد النفس عن الدنيا، والعيشة مرة لوحدها مش ناقصاه".

انتقادات شخصية حادة من الزوج اعتبرتها الزوجة فجوة بينهما: "تطورت القصة بقى للانتقاد الشخصي، لو عملت أكلة حلوة، يدور على العيوب اللي فيها، لو الملح زاد تبقى أحلى، لو اتحمرت أكتر هتبقى أطعم، لكن ميعرفش يقول الحمد لله جميلة، أو تسلم إيدك، زي خلق ربنا.. ودخلنا في مرحلة بقى اللون ده مش لايق عليكي، وشعرك مش عارف إيه، وكل حاجة سلبية يرميها في وشك، لما جابلي اكتئاب ونكد على العيشة، بقيت أكره نفسي".

واختتمت: "مش واخدة حاجة من الجوازة دي، رفعت خلع لأنه رفض الطلاق بالمعروف، وأنا شخص مستقل وناجح ومعنديش أي أمراض نفسية، واتجوزت عشان أخلَّف وأعمل بيت، ومش هضيع وقتي ونفسي مع واحد زي ده، وأجيب لأولادي أب نكدي".