زواج استمر لنحو عام ونصف، انتهى على أبواب محكمة الأسرة، بعدما قررت "نادية. س" 26 عامًا، انهاء زواجها بإقامة دعوى "خلع" حملت رقم 3655/ 2018، لاستحالة العشرة مع زوجها "محمد. ي" 30 عامًا.

ارتباط تقليدي وقع بين الزوجين، تروي الشابة العشرينية لـ"هن": "اتعرفت عليه صدفة في شركة خالي وبعد فترة فاتحني في الزواج، ووافقت لأنه طيب ومحترم وخلال فترة الخطوبة اكتشفت إصابته بفوبيا من كل حاجة في الدنيا حتى إغلاق الأبواب وغلق الأبواب".

مواقف محرجة تسببت فيها الفوبيا التي يعاني منها زوجها، توضح: "كل شوية اتحرج بسببه في موقف لأنه بيخاف بجنون.. يوم الفرح سابني وطلع على السلم في الفندق عشان بيخاف من الأسانسير وأصحابي قعدوا يضحكوا عليّ.. في الأول كنت باخد الموضوع بضحك عشان مزعلش لكن بقى عائق في حياتنا وهو رافض العلاج".

صدامات بين الزوجين بسبب الخوف المرضي الذي يعاني منه زوجها، تضيف: "تعبت منه.. لو صحي من النوم لاقى باب الأوضة مقفول تبقى كارثة ومصيبة ويجيله قفلة في النفس ويزعق ومشكلة ومضطرة أقعد في الدور الأرضي عشان مبيحبش الأسانسير ولو روحنا أي مكان يسيبني ويطلع على السلم وكذلك لو أي باب اتقفل وإحنا قاعدين يقوم يفتحه.. زهقت من تصرفاته الغريبة طول الوقت".