«عيد ميلاد الليلة مين.. عيد ميلاد توبي».. جملة غنتها سامية حسن، في حفل خاص يضم أفراد أسرتها، احتفالاً بعيد ميلاد كلبها، بعد أن تم عامه الأول، واعتبرته فرداً أساسياً من العائلة، وأعدت كثيراً لهذا اليوم، فقامت بتعليق الزينة، لإضفاء مظاهر البهجة، وحضرت له فرخة مشوية مخصوصاً ووضعت فوقها شمعة لرقم واحد تتناسب مع عمره.

«توبي مبيحبش الحلويات فعملت له فرخة وحطيت فيها شمعة وكان فاهم إنه هيطفي الشمعة واتبسط جداً».. بحسب «سامية»، واحتفلت به الأسرة بالكامل، وحضروا له المفاجآت التي تتلخص في عظام من الفراخ والجبن: «كلنا كنا فرحانين وبنحضر لعيد الميلاد بجد كأنه واحد مننا»، فتربطها علاقة صداقة قوية مع كلبها الذي تربيه منذ ولادته، وتتعامل معه كأنه صديقاً حقيقياً، لذلك تقوم بتحضير وجبات الطعام له خصيصاً، وتوفر له مساحة خاصة بالمنزل للعب.

«توبي زيه زي الطفل الصغير جيبت له لعب بنلعب بيها سوا، وأكتر لعبة بيحبها هي الكرة بنفضل نلعب بيها سوا طول ما احنا قاعدين مع بعض».

تقضي «سامية» وقتاً كبيراُ في الاهتمام بكلبها والاعتناء به: «بيقعد معانا على تربيزة السفرة وياكل، وحتى في الحلويات بنعمل حسابه زيه زينا، وكمان لما بنجيب هدوم وخصوصاً في الشتا وبنجيب له كوفايات عشان الشتا»، وتعتني به اعتناء مختلف وتحضر له مشروبه الشتوي.

واختتمت قائلة: «توبي بيحب السحلب زينا وبيشربه واحنا قاعدين بالليل وبقوم اعمله بنفسي»، وتنوي إقامة عيد ميلاد له بكل عام من أجل إسعاده متابعة: «طول ما هو معايا وفي حضني هفضل ابسطه بأي طريقة، دي مش حاجة تافهة بس محدش هيحس بقيمة اللي بعمله غير لما يكون بيربي حيوانات في بيته وبيحبهم ومتعلق بيهم».