بعد زواج استمر نحو 9 سنوات، لجأت «زينب. م» محفظة قرآن، أسفر عن إنجاب طفل 8 سنوات وطفلة 6، أقامت السيدة الثلاثينية دعوى خلع حملت رقم 1398 / 2017 في محكمة الأسرة بالجيزة ضد زوجها «حماد. م» محفظ قرآن في مدرسة خاصة، بعد استحالة العشرة مع زوجها إمام المسجد بدعوى أنه متعدد العلاقات ولديه طفلة من زواج عرفي.

في زواج تقليدي تعرفت فيه «زينب» على زوجها، قالت: «اتجوزنا عن طريق ترشيح أخته لي كانت صديقتي في المسجد شافني مرة وإحنا مروحين سوا وبعدها أخته قالتلي إنه أعجب بي وعايز يتعرف علي ويقابل أهلي.. تاني لقاء قرينا فاتحة وبعدها بحوالي 4 شهور اتجوزنا على طول ملحقتش أعرف طبعه لأن كانت علاقتنا محدودة بحكم الشرع بنتقابل في البيت ساعة ولا اتنين كل أسبوع وسط أهلي والتليفونات بسيطة.. كانت علاقتنا في الأول جميلة رغم إني عرفت بحكاية شربه حشيش ومكنتش موافقة بس عرفت إنه مش حرام لكن مش مستحب.. وقعدنا وخلفت ابني الكبير مروان».

علاقات متعددة اعتاد زوجها الدخول فيها بعقود عرفية، وتابعت لـ"هن": «بعد أول سنة وشوية حصلت خلافات عادية بينا لكن لاحظت غيابه كتير عن البيت ومرة سافر الإسماعيلية قال شغل وهيغيب أسبوع كان قلبي مش مرتاح للسفرية دي.. وبعد ما رجع لاحظت تركيزه مع التليفون ومكالمات بالليل ولما أخدت منه التليفون وفتحته مرة اكتشفت إنه اتجوز علي»

واجهته واستكملت: «قال إنها أرملة غلبانة واتجوزها عشان يساعدها وقعد يقنعني بالدين وإنه واجب عليه يعدد طالما مقتدر ويقدر يعول أكتر من أسرة وإنه بس بيدفعلها فلوس عشان غلبانة والموضوع في السر وبدأت المشاكل بينا تزيد لحد ما طلقها واعتذر بحجة كانت نيته خير لكن بدأت أشك فيه وأتابعه ولاقيت حاجات كتير وعلاقات متعددة وقديمة وأكتر من واحدة اتجوزها عرفي وطلقها.. بعد المشاكل الكتير كنت بعدي أوقات باعتبار إنها نزوة وهتعدي عشان أحافظ على بيتي وأولادي خصوصا إن والدي توفى بعد جوازي ومبقاش لي حد ومش عارفة أروح فين بعيالي».

موقف صعب تعرضت له «زينب» دفعها للخلع متابعة: «كل مرة كنت بعدي ويرجع يعتذر لكن تعبت والمرة دي خلف من الحرام والست اللي خلف منها بتهددنا بالفضيحة ورفعت عليه قضية إثبات زواج ونسب للبنت اللي بتقول عليها بنته».

واختتمت قائلة: «ولما واجهته قال إن حد مسلطها عليه عشان يخرب علينا بيتنا وإنه بيحبني وإنه ابتلاء واختبار من عند ربنا لكن المرة دي مش قادرة أصدقه انفصلت عنه ورفعت الخلع لأنه ساب البيت ورفض الطلاق».

«زينب» اسم مستعار لزوجة ثلاثينية مقيمة في إحدى ضواحي الجيزة، فضلّت عدم ذكر اسمها حرصا على سلامتها.