تركت التدريس فى الجامعة وطلت على المشاهدين من باب المطبخ، بهدوء وصوت منخفض وحركات مرتبة تعد حلوى معقدة ودقيقة. وجهها مألوف لمحبى الطهى فى العالم العربى، فقد طلت عليهم منذ سنوات طويلة عبر قناة «فتافيت»، واستطاعت أن ترسم صورة منمقة للشيف، وتحجز مكانة خاصة فى قلوب مشاهديها، وتستعد حالياً لاقتحام عالم التمثيل بفيلم سينمائى.

كيف كانت حياتك قبل المطبخ؟

- أنا خريجة آداب إنجليزى جامعة إسكندرية، وكنت معيدة فى الجامعة، ولما اتجوزت وبدأت أطبخ حبيت الطبخ واتميزت فيه، فقررت أدرس الطبخ فى إنجلترا، وأخدت شهادة فى الطهى والحلوى، وبدأت أحترف المجال.

هل وجدت صعوبة فى الوقوف أمام الكاميرا؟

- لا. تجاوزت الأمر بسهولة، كنت بركز فى اللى بعمله عشان أعلم الناس، وقدرت أحقق ده مع جمهورى فى قناة «فتافيت».

ما آداب وضوابط الوقوف فى المطبخ؟

- كل مكان وله لبسه، والوقوف فى المطبخ له أصول، لازم يكون الشخص رابط شعره، لابس مريلة أو جاكت مطبخ، يقص أظافره، كمان لازم الملابس تكون قطنية، لأن الألياف الصناعية تساعد على الاشتعال، ولا يجوز لبس الخواتم والأساور، مش لازم أورى الناس إنى عندى خاتم، فالأهم هو السلامة والأمان.

هل تعرضت لمواقف فجائية أثناء الطبخ؟

- لا، خاصة أن برنامجى مسجل، ودائماً بشترط ده، لأن صناعة الحلويات لا يمكن التحكم فيها، الكيكة مثلاً ممكن تستوى فى 20 دقيقة وممكن توصل لنص ساعة، يعنى بمعنى أصح الحلويات هى اللى بتمشينا مش إحنا.

لماذا تخصصت فى الحلوى؟

- لم أتخصص فيها، لكن على مدار مشوارى دائماً يطلب منى التركيز عليها، لأن مفيش حد متخصص فى الحلويات، وسبق وعملت موسم طهى فى «فتافيت»، وأسعى لعمل موسم مشابه فى «cbc سفرة»، وبقولهم بلاش تحصرونى فيها، خاصة إنها أدق فى صناعتها، فجميع الوصفات تعتمد على نفس الخامات، والاختلاف يكون فى الكميات.

هل شعبيتك زادت بعد الانتقال إلى «Cbc سفرة»؟

- Cbc سفرة شهرتنى فى مصر، خاصة إن معظم جمهور «فتافيت» كان من الخليج، وعلاقتى بالناس قائمة على الاحترام والود، وبحاول دائماً أخلى الناس ترجع للمطبخ وتحبه زى ما أنا بحبه، عشان كده الناس بتحس إنى مختلفة.

هل يدخل أبناؤك المطبخ؟

- عندى ولد وبنت ليس لهما أى علاقة بالمطبخ، باستثناء الأكل.

متى تشترين الأكل الجاهز؟

- أحياناً بتعب من الطبخ بعد العمل لفترات طويلة، خاصة إن عندى يوم تحضير ويوم تصوير، ووقتها باكل من بره.

ماذا أضاف لكِ لقب «شيف»؟

- سِبت الإسكندرية وبعيش فى القاهرة من 3 سنين بسبب حبى للقب شيف. أسعد الناس اللى بيشتغلوا اللى بيحبوه، وللعلم تعليم الناس الطبخ يتطلب توافر ملكات فى الشيف أكتر من مهارته فى الطبخ، وعمرى ما حسيت بملل من أسئلة الناس اللى بتحاصرنى فى كل مكان حتى فى السوبر ماركت والكوافير.

متى تعتزلين المطبخ؟

- لا أعتقد، وإن كنت أفضل التعرف على مجالات مختلفة، وحالياً أشارك فى ورشة تمثيل، وأستعد لاقتحام مجال التمثيل بفيلم سينمائى فى دور ليس له علاقة بالطبخ.