رئيس مجلس الادارة:

د. محمود مسلم

رئيس التحرير:

مصطفى عمار

رئيس مجلس الإدارة:

د. محمود مسلم

رئيس التحرير:

مصطفى عمار

علاقات و مجتمع

ربات البيوت يصنعن منتجات «السوبر ماركت» فى البيت: جبن ولانشون وحلاوة طحينية

كتب: سلمى سمير -

12:45 م | الثلاثاء 05 يونيو 2018

صورة أرشيفية

حاولن الاستغناء عن السوبر ماركت وتجهيز جميع المستلزمات التى يحبها أبناؤهن فى المنزل، «البقالة البيتى» فكرة حاولت ربات البيوت من خلالها توفير منتجات الأجبان واللحوم المصنعة والحلاوة بشكل بيتى وجودة مضمونة، مرة يصنعن الجبن الرومى والشيدر والموتزريلا والقريش والجبن اللايت وأخرى يصنعن اللانشون والحلاوة الطحينية، معلنات بذلك راية التوفير.

يعد اللبن هو المكون الأساسى فى معظم الوصفات البيتى، بحسب أميرة عطية، ربة منزل، التى صنعت الجبن القريش قبل بدء رمضان: «الجبنة غليت دلوقتى جداً لكن الطريقة البيتى كلفتنى تمن كيلو اللبن بس»، فى البداية تقوم بترك اللبن داخل الحلة لمدة يوم كامل: «اللبن هيتجبن، هتقومى مطلعة قطع الجبن دى وتحطيها على حصيرة أو مصفى عشان تتخلص من كل المية الزايدة اللى فيها بشكل نهائى»، وبحسب «أميرة» فإنها بعد ذلك تكون جاهزة للاستخدام: «مبتخدش وقت خالص وطعمها بيكون لذيذ جداً زى القشطة».

بنفس الطريقة البيتى صنعت «أميرة» الجبن الرومى: «جبت كيلو لبن وعلبة زبادى وفلفل أسود وثلث كوب ماء مثلج وبطاطس مهروسة وقشطة، لازم اللبن يكون مغلى وبعدها بحط عليه كل المقادير لحد ما يبقى عجينة»، فى المرحلة الأخيرة تضع العجين فى الشاش وتعصر حتى تتخلص من المياه تماماً وتحصل على قطعة جبن جافة: «وفرت كتير فى المصاريف والطعم مش مختلف بشكل كبير». ترى «الشيف» نور جاب الله أن فكرة تقديم منتجات البقالة داخل المنزل انتشرت مؤخراً، خاصة فى رمضان: «الأسعار ولعت ودى حاجات مضمونة وموفرة»، منذ اللحظة الأولى التى نشرت فيها وصفات بيتى على فيس بوك، حظيت بإعجابات كثيرة: «الناس مبقاش عندها ثقة فى أى منتجات مصنعة بره البيت».

أما شيماء ذكى، ربة منزل، فحب أولادها للحلاوة الطحينية جعلها تقبل على عملها بالمنزل للتوفير: «ولادى وجوزى بيعشقوها، العلبة مابتكملش عندى يومين، ده اللى خلانى أعملها فى البيت»، الحلاوة الطحينية بكل أنوعها أبدعت فى صنعها: «عملت حلاوة سادة وبالشيكولاتة والمكسرات والكراميل وطعمها طازة وأحلى من برة بمراحل».

لا تتكلف طريقة عمل الحلاوة الطحينية سوى كوب من اللبن النيدو مضافاً عليه كوب من السكر البودرة وطحينة: «بنعجن كل دول مع بعض وبعد كده بنضيف المكسرات ونحطها فى قالب وفى التلاجة على طول»، وبحسب «شيماء» فإن هذه الطريقة وفرت لها الكثير بميزانية المنزل: «وفرت كتير جداً وبعمل كمية أكتر من اللى كنت بشتريها».