كتب: مها طايع -
01:03 م | الخميس 17 مايو 2018
لديه قاعدة جماهيرية عريضة بمصر والوطن العربى، ليس لكونه واحداً من أمهر الطباخين، وإنما لشخصيته المرحة ووجهه البشوش وابتسامته العريضة التى يطل بها دائماً على جمهوره، يظهر الشيف شربيني ظُهر كل يوم على الهواء مباشرة عبر برنامجه «الشيف» على قناة «cbc سفرة»، متألقاً في زيه الأبيض الذي يحرص على أن يكون إطاره الملون هو نفسه لون جراب نظارته والساعة التي يرتديها، مردداً كلماته الشهيرة التي حفظها الجمهور: «اللهم صلِّ على كامل النور، يا صلاة النبي، ورقة وقلم واكتبي ورايا يا ست الكل»، ليجسد صورة للرجل الشرقي البسيط.
الأكل من مسببات السعادة للرجل وبرامج الطبخ قللت نسب الطلاق فى مصر
من هو الشيف شربيني؟
- أنا اتخرجت في كلية السياحة والفنادق عام 1966، وخلال دراستى اتعلمت أصول ومبادئ الطبخ النظرية والعملية وده اللي ساعدنى على إني أكون شيف ناجح.
أين عملت في بداية مشوارك؟
- اشتغلت في الفنادق الكبيرة، وفي مطاعم أندية تابعة للقوات المسلحة، ثم سافرت إلى دول أوروبا، وعملت في بعض المطاعم هناك، وخلال تلك الفترة تعلمت أكلات لدول أخرى غير عربية، وهذا ما زاد من تميزي.
هل اعترض أحد من أسرتك على عملك في مجال الطهي؟
- نهائي، لأن والدي كان شيف كبير، وأنا اتعلمت منه حب المطبخ، كان بيحب يعمل الأكل في البيت وأنا كنت دايماً أقف أتفرج عليه وأنا مبهور بيه.
وماذا عن بداية عملك في التليفزيون؟
- الأول كانت القنوات بتيجى تصور معايا داخل الفندق، وبعد كده اتعرض عليّا برنامج أسبوعي على قناة الأسرة والطفل مع شريف مدكور، وكنت بظهر فى بعض البرامج كضيف، وقدمت برنامج «سفرة دايمة» على قناة «الحياة» لعدة سنوات، حتى انتقلت إلى «سي بي سي سفرة».
متى دخلت المطبخ لأول مرة؟
- كان عندي 12 سنة، دخلت المطبخ من ورا أمي عملت رز وحرقته ومن ساعتها، رفضت تخليني أدخل المطبخ تاني، بس أنا من كتر حبي للمطبخ كنت بدخل من وراها وهي مش موجودة أو نايمة.
هل تشارك زوجتك في إعداد الأكل بالمنزل؟
- لا، أنا بطبخ في الشغل بس، ما بطبخش في البيت، مراتي هي اللي بتعمل كل حاجة بنفسها، وأكلها لا يُعلى عليه، ولو عملت حاجة ناقصة ولا مش مظبوطة بلفت نظرها وهي بتتقبل ده عادي جداً ومن غير زعل.
هل تعمل زوجتك في مجال المطبخ؟
- لأ، مراتي مذيعة في الراديو.
ما الفرق بين عملك كشيف في فندق أو مذيع في برنامج طهي؟
- وأنا شيف بكون حريص على إنى أعمل أكل حلو وبس لأن ده شغلي والناس بتيجى عشان بتحب تأكل من إيدي، لكن عملي كمذيع بيحمّلني مسؤولية أكبر ولازم أكون قدها.
وماذا عن علاء الشربيني الذي ورث المهنة أباً عن جد؟
- أنا شجعت علاء على حب المطبخ وعلى الاتجاه للمجال ده، وهو كان عنده استعداد ودايماً وهو صغير كان بيقول نفسى أطلع شيف زى بابا، إحنا عيلة بتحب المطبخ بالوراثة.
هل تغير من نجاحه؟
- مستحيل، أي أب عايز ابنه يبقى أحسن منه، وأنا دايماً بشجعه وواقف في ضهره.
كيف تختار وصفات الأكل التي تقدمها يومياً؟
- عندي مساعدين ومعدين خاصين بيّا، هما اللي بيجهزوا كل حاجة وأكل كل حلقة جديدة.
كيف تتصرف في حال احترق الطعام على الهواء؟
- والله حصلت قبل كده وأي شيف على الهواء معرّض لده، ولما بيحصل معايا باعتذر للمشاهدين وأقول لهم أنا آسف الأكلة باظت منى، عشان مأضرش حد بيقلدني في الطبخ.
ماذا تقول للسيدات اللاتي يتابعن برامج الطهي ولا ينفذن الوصفات؟
- أقول لها «أمّال إحنا بنعمل الأكل ده لمين يا ست الكل»، مايصحش، لازم تتعلمي الأكل عشان تبسطي أسرتك ونفسك، وتبعدى نفسك وأسرتك عن الروتين فى الأكل.
هل سألك مشاهد عن وصفة لا تعرفها؟
- آه حصلت وقلت له ما أعرفش، ولو مشاهد تاني يعرفها هخليه يعملها لى على الهواء، المطبخ مجاله واسع ووارد إن يبقى فيه أكلات ما أعرفهاش.
ما أكثر الانتقادات التي تعرضت لها؟
- بيقولوا لي الفوطة مابيبقاش منظرها لطيف، وإزاي تعمل الأكل من غير ما تلبس جوانتي، وبرد عليهم أقول لهم لو إنتم بتلبسوا جوانتي في البيت أنا هلبس على الهوا.
