"تقبل نفسك.. إحنا بنتولد من جديد بعد كل أزمة بنتعرض لها".. كانت مقدمة الفنانة ياسمين غيث محاربة السرطان، في كلمتها بملتقى "هي تستطيع" she can 2018، الذي أقيم بمقر الجامعة الأمريكية بالقرب من ميدان التحرير بحضور أكثر من 2000 من رائدات الأعمال في المجالات المختلفة، بمشاركة الشركة تأكيداً على دعمها الدائم للمرأة وبخاصة فيما يخص البحث العلمي وذلك من خلال برنامج "لوريال-يونيسكو من أجل المرأة في العلم".

وتابعت ياسمين: "السرطان بيدينا فرصة تعيش مرتين.. الكلمة دي أنا شاركت بيها في كتابة أحد مشاهد مسلسل حلاوة الدنيا وحقيقي كنت بقولها من قلبي.. لأنها حقيقية قوي.. كل مِحنة بنتعرض ليها وموقف صعب بنحس إننا أقوى وأفضل وبيدينا خبرة تعيش بيها اللي جاي وبيعرفنا قيمة الناس الحلوة في حياتنا الداعمين بصدق وإخلاص.. أنا بشكر عيلتي والدي ووالدتي وجوزي وابني.. هما سبب وجودي هنا دلوقت وسبب إني حاربت الموت عشانهم".

وأضافت: "أنا عايزة أحكيلكم حاجة.. كان لي الشرف إني أحقق أمنية حد من جمهوري.. مريضة سرطان طلبت تشوفني أنا وهند صبري خلال التصوير والحقيقة هند متأخرتش أبدا وراحت وشافتها.. أنا كان عندي ظرف مقدرتش.. لكن كلمتها فيديو كول.. البنت دي كلمتني من كام يوم وقالتلي شكرا انك حققتي حلمي.. للأسف أنا عرفت إننا خسرناها من يومين ومقدرتش تكمل".

وتابعت ياسمين باكية: "أنا أسفة إني اتأثررت كده..لكن البنت دي رغم إني مضايقة لوفاتها إلا إني سعيدة إني قدرت أخليها لحظة مبسوطة.. لو في ايدك لحظة تساعد حد أو تحققله أمنية اوعى تتأخر.. يمكن في يوم تندم لو اتأخرت.. حب الناس نعمة".