رئيس مجلس الادارة:

د. محمود مسلم

رئيس التحرير:

مصطفى عمار

رئيس مجلس الإدارة:

د. محمود مسلم

رئيس التحرير:

مصطفى عمار

علاقات و مجتمع

كتالوج الحياة| الحلقة العشرون.. زي ما تعمل هتلاقي

كتب: داليا رشاد -

01:48 م | الأحد 28 يناير 2018

صورة أرشيفية

زى ما هتعمل هتلاقى...هو الناس بتضايقنى ليه...هو الناس مالها بقت وحشه كده ليه...ايه يا ربى كمية النفسنة والحقد دي...واسطوانات من دي كتير بقينا هنسمعها طول الوقت وساعات كتير بتقولها....مش ده المهم...المهم ان احنا كمان مصدقينها وماشيين على أساسها وبقت دى اساس تعاملاتنا فى الحياة مع غيرنا...بقينا بنصحى من النوم الصبح عارفين ان اول واحد هيقابلنا ويقول صباح الخير شايل سكينة ورا ضهره و هيخبطنا بيها لو مردناش الصباح...مش بس كده...ده الواحد بيلبس ويتشيك ويبقى ولا نجوم هوليوود عشان خارج او رايح مناسبة وهو متأكد ان الف واحد هيبص له ويحسده ويحقد عليه وهيسلم عليه وهو مش طريقه....ناولنى كده الكتالوج من فوق الرف...

الكتالوج بيقول زي ما هتضرب هتلاقى...زي ما تحسب هتلاقى...ماهو انت مش هيجليك انتفاخ على معدة فاضية اكيد اللى دخلته فيها هو السبب...عشان كده خد بالك .... you are what you eat ...بالبلدي كده ازرع حب هتلاقى حب ازرع كره هتلاقى كره....اللى بتقابله وتلاقيه من الناس مش طالع منهم ده مجرد انعكاس للى جواك...ومش قصدى بكده ان جواك حقد وحسد ونفسنه بس هو انعكاس للهواجس اللى جواك للانطباعات السلبيه اللى جواك...ماهو احنا من الناس والناس هما احنا فزي ماهنخاف منهم هيخافوا منا...زي ما هنشوفهم مصدر السلبية هيشوفنا هما كمان كده....

لكن لو الناس شافت اننا مصدر بهجة وطاقة إيجابية معندناش سوء ظن عندنا حذر بس...بنتوقع كل الخير من حوالينا...هيكون هما مصدر الخير ده حتى لو كانوا أبناء دراكولا...هو مش دايما مامتى وجدتى والدادة يقولولنا قبل اى حاجة صعبة شايلين همها اللى تخاف منه مايجيش احسن منه...دي كانت وسيلتهم فى انهم يطمننوا ويقولولنا ان ربنا موجود وان يكون عندنا دايما امل وتفاؤل...عشان كده انزل قول صباح الخير وانت مبتسم ومتقلقش محدش هيقولك.. بس هيلف ويقولك يسعد صباحك وتاخد احلى رد ودعوة تبدأ بيها اليوم وانت مش عامل حسابك...انت اللى فى ايدك ترسم حياتك يا كلها حقد ونفسنه...يا كلها يوم كده ويوم كده...يعني يوم سالك ويوم ملعبك بس برضو سالك

الكلمات الدالة