كافيه البنات
صورة أرشيفية

أنا متجوزة وعندي 3 بنات أطفال وزوجى بيعاملني معاملة وحشة جدا.. إهانة وإهمال وضرب وتجاهل وعدم احترام قدام بناتي.. وده لانى بيخونى مع واحده متجوزه وعندها ٤ اولاد كمان بيكلمها ليل نهار ومش بيقعد فى البيت خالص عشان يكلمها لما ترن له بعد ما جوزها بيمشى العلاقه بينهم بقالها ٧ سنين وهو عباره عن كلام وحب فى الفون ولما انهار واواجهه ينتهى الموضوع بالضرب. هى واحده مش كويسة ومسيطره عليه وقالت لى انا حطاه فى جيبى ولو عرفت جوزها هيطلقها .

انا بيتى بيتخرب جربت معاه كل الحيل.. ماحدش يقول اهتمى بنفسك وتجاهلى كل دا ما جبش نتيجه انا بموت بالبطىء ولولا بناتى كنت اطلقت بس مش هقدر اربيهم واشيل مسؤليتهم لوحدى ومقدرش اشوف الكسره فى عينهم. وفى نفس الوقت مش قادره اتحمل الوضع جالى المرض وتعبت ومش عارفه اعمل ايه؟

مساء الخير يا حبيبتي.. قلبي عندك وحاسة بيكي.. في كذا حاجة في مشكلتك أولها لازم تفكري مع نفسك كده أنتي عايزة ايه من جوزك يعني لسى بتحبيه وعندك أمل فيه ولا عايزة تحافظي على الأب بس في البيت ؟ وتاني حاجة هو ليه بيعمل كده ومقصدش إنك مقصرة معاه عشان الخيانة مش مبرر لتقصيير الزوجة أو الزوج.. الخيانة مرض ولموآخذة قلة أصل وتربية.. متزعليش مني والحاجة الأهم يضربك ليه عشان خاين ! بيقولوا عليه ايه ده !! نصيحتي ليكي لازم جوزك يحس بيكي ويحس النار اللي جواكي ده لو عايزاه يرجع ولازم لازم تشتكي لأهلك أو تنفصلي بأي شكل الضرب ده في يوم ممكن يموتك ولا يموت حد من عيالك لازم حد يقفله.. لو تقدري تنفصلي عنه وحاولي تشتغلي وتدبري فلوس لحياتك عشان تقفي على رجلك.. جوزك بالشكل ده شخصية ضعيفة وأي واحدة سهل تلف عليه والست دي لازم تفضحيها لو ملمتش نفسها عنك وعنه.. لكن الأصل جوزك يا حبيبتي لو هو اللي بيجري وراها د أو غيرها هيفضل يرمي لبرا عشان كده لازم تاخدي موقف.. والضرب وقلة القيمة دي مش حل

الكلمات الدالة

أخبار قد تعجبك