الواحد يا جماعة بيصحى الصبح عليه وش.. ماشاءالله يقطع الخميرة من البيت.. في أوروبا والدول المتقدمة بيقولوا poker face اللي هو من غير أي تعبير وشوية شوية يبقى من غير ملامح كمان.. وأول ما يبص لنفسه في المرايا ويشوف اللي الناس هتصطدم بيه ونشوف.. واضح إنه بيشفق على حال الناس وبيصعبوا عليه لدرجة أنه بيكمل حزين ومكشر طول اليوم.. يا نهار أبيض.. ده ايه العيشة دي.. هو محدش سمع اغنية عبدالمنعم مدبولي والمجموعة.. الحلو ونبي تبسم لنبي والنبي تبسم..

طب بلاش دي أكيد كل الأجيال سمعت الهضبة بيقول ضحكت عيون حبيبي.. ده بقى فيه عملية تجميل مهمة ولا إيه جدا وكل النجوم عملينها اسمها Hollywood smile خير يا جماعة أنا فعلا باقوم مخضوضة من شكلي وبحمد ربنا إن اللي بيشوف المنظر ده قبل ما يتصلح بالميك أب والشعر واللبس هما فكرة حبايب قلبي.. احنا فعلا محتاجين كتالوج للموضوع ده والكتالوج بيقولك بمنتهى البساطة اللي في الدنيا ابتسم.. أصل الابتسامة اللي اتكتب فيها أغاني وأشعار واللي كل رواية أو نص مكتوب بتوصفها بأدق التفاصيل لدرجة إنك لو بتقرأ هتلاقي نفسك بتبتسم تلقائيا.. عشان الكتالوج جاب من الأخر قالك وأنت نازل من البيت بدل ما تاخد الباب في ايديك ممكن تاخد ابتسامتك معاك..

بيقولك وأنت بتلبيس وتجهزي ونازلة كده بكامل هيئتك وجمالك متنسيش تلبيس أهم قطعة اكسسوار وأغلى حاجة كمان .. ابتسامتك أصل الابتسامة يا جماعة ليها مفعول السحر وعن تجربة.. يعني أنا واحدة من الناس اما بنسى كده وابتسم في وش الناس سواء الكاشير.. البواب.. السايس.. حتى الشحات.. مش عايزه أقولكم ايه اللي بيحصل.. يانهار أبيض كأنهم شافوا الأميرة ديانا قدامهم..

ويفتح على نفسي كمية طاقات إيجابية والله مبلاحق.. ده حتى اما علمونا إن الابتسامة صدقة نسيوا يعرفونا إن تأثير الابتسامة السحري مش بس على اللي بيتسم.. ده تأثيره على اللي أنت ابتسمت له أقوى من أي دوا.. الابتسامة علاج.. الابتسامة حل.. الابتسامة سحر.. الابتسامة عدوى يا جماعة وبتفتحت كل الأبواب.. جرب كده تبدأ يومك بالابتسامة وشوف هتأثر عليك وعلى كام واحد غيرك لمدة كام ساعة في اليوم واحسبها.. واتوكل.. كل اما تلاقي عدد ساعات الكاشير بتقل في اليوم مرن نفسك انك تبتسم كل يوم وانت نازل.. لحد ما نوصل كلنا لمرحلة اننا نبتسم أول ما نفتح عينينا عشان احنا الحمدلله صحينا ولسه عايشين وبنتنفس ولسه عندنا حياة.. أصل الابتسامة حياة..