رئيس مجلس الادارة:

د. محمود مسلم

رئيس التحرير:

مصطفى عمار

رئيس مجلس الإدارة:

د. محمود مسلم

رئيس التحرير:

مصطفى عمار

علاقات و مجتمع

طنط فيفي| الحلقة السابعة.. جوزي عاوز يتجوز عليا: محتاج علاقة جنسية

كتب: الوطن -

08:12 م | الجمعة 05 يناير 2018

صورة أرشيفية

أنا عندي 34 سنة متجوزة بقالي 6 سنين ومعايا ولد وبنت.. مشكلتي في الحياة إن جوزي بيحب واحدة مطلقة من قبل ما يعرفني ولا يتجوزني وأهله رفضوها وبعد عنها وحبني وخطبني واتجوزنا والحمد لله مكنش في مشاكل في حياتنا نهائي لحد المفاجئة اكتشفت إنه بيخوني معاها في بيتي وبرغم من كدا محدش عرف عني أي حاجة وتعبت نفسيا وجسديا وكان هو السبب وبرغم كل دا كان بيعاملني أسوأ معامله وأنا تعبانة ولما الحمدلله عدت الفترة دي واسترديت صحتي بدأ يكلمني في موضوع الجواز وإنه عايز يتجوزها عشان هو محتاج كراجل إنه يتجوز تاني..

أنا مش فاهمة ولا مقتنعة بالكلام ده.. هو شايف إن هي الوحيدة اللي هترضا بعيشته وإنه واحد عنده ولاد بس هي أهم حاجة عندها إنه يكون موجود في حياتها ومش فارق معاها أي حاجة تاني.. المهم وفضل يعاملني معاملة وحشة جدا ولما بدأت أتعب تاني قولتله روح اعمل اللي أنت عايزة أهم حاجة عندي إنك تعاملني كويس وكان بيحكيلي كل حاجة خطوة بخطوة وكنت بموت في اليوم ألف مرة والموضوع وقف من عند ربنا وهو سبحان الله بقى كويس جدا معايا.. وبعد فترة لقيته بيكلمها تاني ومبعدش عنها أنا طلبت الطلاق قالي مستحيل مهما حصل استغنى عنك أنا عاوز زوجة تانية وهي فرصة لكن أنتي مستحيل أسيبك.. أنا قولتله يا أنا يا هي برغم إني قادرة أروح لأهلها وأفضحها بس والله صعبانه عليا بقول كفاية اللي هي عملاه في نفسها وربطة نفسها بواحد مش محتاجها غير للعلاقة الجنسية بس..

ولا شريها ولا حاجة أنا مش عارفه أعمل ايه عارفه إنه بيكلمها بس مفهوش أي عيوب تاني وصابرة وبقول يمكن ربنا يرزقني بحل مع العلم أنا صاحبته أكتر من إني مراته ولما بيتخنق مبيتكلمش مع حد غيري هو عارف إنه ظلمها وظالمني وربطها جمبه بس هي برضو معندهاش استعداد تسيبه وكل شويه تقوله شوفلي حل..

وأنا بموت في اليوم ألف مرة عشان مش عارفة أخرة العيشة دي اية وديما خايفة من الاي جاي عايزة أعرف هو فعلا الراجل ممكن يبقي عايز يتحوز عشان غريزة فيه محتاج حاجة معينة بزيادة شوية فعيزها بالحلال عشان معندوش استعداد يعمل حاجة حرام تاني فعلا الكلام دا صح؟؟

تصدقي انتي حرقتي دمي؟ آه والله حرقتيه عشان واحد جايبلك المرض وجايبلك الفقر ورايح يجيبلك ضرة وانتي بتسألي عن احتياجاته ومشاعره ومش طالبة منه غير معاملة كويسة.

ياختي علملي نفسك انتي كويس الأول، واحترمي روحك وكيانك ودافعي عن بيتك شوية وزي مابتربي عيالك لازم تربي جوزك شوية، يعني ايه يجيبها البيت ويعمل معاها علاقة؟ دا زنا يا حبيبتي، والمصيبة ملكيش عذر بلسانك قلتي لما تعبت ووقعت عاملك وحش يبقي خايفة من إيه؟

قدامك كذا حل تعمليهم أول حل تكلمي الست دي كست زيها بالأدب وتطلبي منها تحترم روحها وتبعد بالأدب محصلش تسجليلهم هم الاتنين وتعرفيها إن رقبتها في إيدك، مارتجعتش يبقى التالتة تابتة وجري تروحي لأهلها تعرفيهم بالحكاية من طقطق لسلام عليكم وتطلعي من عندهم على أهلك عشان مايرحعش يتعصب عليكي وشوفي حد أمين وكتوم في أهله وليه سلطة عليه تقوليله إللي حصل وليه غضبانة، لو لم نفسه وجه اعتذرلك كدا عملتي لنفسك كرامة، لو رجع يلعب بديله تاني تسيبيه بضمير مرتاح يا بنتي بدل مايجيبلك جلطة ولا ذبحة المرة الجاية.

الكلمات الدالة