أنا بنت عندي 20 سنة بدرس في الكلية، مشكلتي إني مش عارفة أعيش سني ولا قادرة أكون زي البنات اللي قدي.. منعزلة ومعنديش علاقات ولا صداقات زي البنات اللي بشوفها هما بنت أو اتنين زمايلي في الكلية بتحرج قوي من انتقاداتهم لي طول الوقت عشان بلبس واسع ومش بتكلم مع ولاد.. لكن أنا عارفة مشكلتي الحقيقية هي إن والدي متعدد العلاقات ووالدتي ست محترمة ومتدينة لكن معندهاش حد لا أخ ولا أب هو أنا وأختي بس.. المشكلة إنها ربتنا دايما على الخوف، طول الوقت من وإحنا صغيرين بنشوفها بتعيط وتصلي ورغم كل اللي بابا بيعملوا فيها من إهانة وضرب وخيانة، بترجعله وهي اللي بتروح تصالحه.

"أنا بكره كل الرجالة حقيقي.. دايما بشوفهم شبه أبويا أنانيين بيفكروا في نفسهم بس.. أنا عمري محلمت زي البنات إني أحب وأتحب وأتجوز ويوم ما أمي بتفكر أو تشتري حاجة تشيلها لينا عشان الجواز دايما بتخانق معاها.. أنا بكره أبويا جدًا وشايفاه ظالم وعمري ما هحبه أبدا أنا بدعي عليه دايما يموت وبتخيل حياتي لو هو مش موجود هتكون سعيدة جدا، أنا دايما بفكر إني أموت نفسي بس بخاف من ربنا وبخاف على أمي، نفسي أخلص وأشتغل وأعيش لوحدي".

أهلا بيكي يا حبيبتي..

أنا حاسة بيكي قوي ومقدرة المشاعر الوحشة اللي خنقاكي من والدك ووالدتك.. صعب قوي إن بنت المفروض تحس إن أبوها ده "السند والضهر والأمان" تفضل عايشة بسببه في "غربة".. اه والدك أناني وأمك زي مقولتي سلبية.. لكن حبيبتي هوني على نفسك الأمور.. كل حاجة في الدنيا بتعدي أنتي شابة ومتأكدة إنك زي القمر وإن في شباب كتير يتمنوا ضفرك.. إحنا بشر وبنغلط كتير قوي وعشان كده لازم نسامح ونستوعب بعض

والدتك مظلومة أكتر منك ومن أي حد تاني دي واحدة عاشت حياتها في القهر ده عشان أنتي وأختك تتربوا وتعيشوا كويس.. "سلبيتها" اللي أنتي بتنتقديها دلوقت هي اللي خلتك أنتي وأختك تدخلوا الكلية "رغم كل الحزن" اللي جواكي.. مين عارف لو كانت اطلقت من والدك كان ايه حصل ومين كان هيصرف عليكم ! هي قبلت الإهانة دي على نفسها عشانكم.. وواجب عليكي أنتي وأختك تكرموها دلوقت وتقفوا جنبها مش تنتقدوها

أما والدك فأنا أتمنى كل أب من نوعية والدك يشوف كلامي ده كويس.. ربنا مبيقبلش بالظلم أبدا ومتأكدة إنه هيفوق بس بعد ما الأوان يفوت.. ادعيله بكل طاقة الغضب اللي منه دي ادعيله ربنا يساعده عشانك أنتي وأمك وأختك.. اللي هو فيه ده ابتلاء ليكم كلكم..

أما أنتي فيا حبيبتي مش كل الرجالة "مصطفى أبو حجر" على رأي الفنانة الجميلة ليلى علوي، في منهم بردو كويسين وبيحبوا بناتهم وبيراعوا ربنا فيهم.. لكن الرك على اختيارك أنتي لشريك حياتك وأنا متأكدة إنك مش هتغلطي غلطة والدتك وهتختاري كويس.. ومش عايزاكي تفكري في الجواز دلوقت ده نصيب.. لكن خلي أمانك في نفسك أنتي ذاكري كويس واتخرجي واشتغلي واترقي في شغلك وخدي أمك وأختك في بيت تاني لو عايزة تبعدي عن والدك.. فكري في الحياة اللي جاية والسعادة برا عن والدك اعتبريه راجل مريض وخلي عندك شفقة بيه ورحمة لوجه الله.. مش عايزة أضغط عليكي في ده.. لو تقدري تكلميه وتقوليليه بطريقة حلوة أنكم كبرتم وعارفين هو بيعمل ايه كويس.. يمكن يتحرج منكم ويبدأ يفوق.. لكن اوعي يا حبيبتي من فكرة الانتحار دي أنتي وردة جميلة اوعي تخليها تذبل

بنوتة جميلة ورقيقة زيك لازم تبقى زي القمر.. اقفي قدام المراية وقولي لنفسك أنك حلوة وشوفي جمالك من جوا مش من برا بس وخليكي واثقة في نفسك واضحكي وأخرجي واعملي صحاب كتير طالما بتراعي ربنا في حدوده توكلي على الله وانبسطي..