التغيير.. إيه هو التغيير..؟

التغيير هو كسر الروتين.. التغيير هو تجربة حاجة جديدة عليك سواء كانت وحشة أو حلوة بس هي حاجة جديدة.. التغيير هو أكبر تحدي ممكن يتعرض له الإنسان.

التغيير هو كسر المألوف..

التغيير هو حاجات كتير..

التغيير يبان صعب أوي ومرفوض في الأول من ناس كتير.. لكنه هدف وتحدي لناس تانية أكتر.. وساعات بيبقى هواية لناس تالتة وساعات بيقلب لعدم استقرار لناس رابعة.. وده بقى مبنقولش عليه تغيير ده ممكن نسميه زهق أو سطحية و تردد عشان كده كل شوية بحال..

فى الكتالوج هنلاقي إن مش دايما التغيير سهل بس هو مطلوب ومتاح هو في إيدينا إحنا اللى بنقرره، وإحنا اللي بنفذه بس أهم حاجة لازم نأخد بالنا منها في قرار التغيير ده هو عامل الوقت.

ايوه عشان الوقت ده من أهم العوامل اللي بتساعد على التغيير يعني طالما قررنا التغيير يبقي منستناش أي حاجة وننجز عشان كل أما الوقت بجري كل أما الموضوع مش في صالحنا ولا في صالح التغيير..

لو أنجزت في الوقت وغيرت هتوصل لو استنيت هتفضل زي ما إنتي.. عشان كده وأنت بتغير متستناش إنك تكمل كل عوامل التغيير حط الوقت قدامك وامشي بالخطة دي إنك تغير اللي هتقدر تغيره دلوقتي والباقي هيتغير هيتغير سواء دلوقتي أو بعدين..

الكتالوج أكد بس على حاجة مهمة جدا إنك بتتغير عشانك إنت عشان نفسك.. مش عشان غيرك أو مش عشان تعجب بمعنى أصح.. لأن اللي بيعمل كده ده ميبقاش اسمه تغيير خالص ده بيبقى عامل زي الحشو المؤقت بتاع السنان أو إستبن العربية حاجة تمشي وتنجز بس مش عملية وبتوجع في بعض الأحيان لأنها مش الدايمة أو المفروض تتم..

بس إنت أبدا بالتغيير.. التغيير تجديد.. التغيير تحدي.. التغيير حياة..